Page Text
________________
१५०
सिरिचंदकित्तिरिय
तज्जेऊणं ठाणंतराई तह हिंडिकारए पुरिसे । रक्खेयव्वं नयरं सबाहिरब्भितरं तुमए ।।४८३२।। तह कह वि जहा जायइ उवद्दवो नेय कस्सइ जणस्स। रोरस्स वि अट्ठ दिणे अज्जप्पभिई जओ को वि ।।४८३३।। धारेयव्वो न मए गुत्तीए कयमहावराहो वि । जाव समप्पइ जत्ता जुयाइ जिणदेव-भवणम्मि ।। ४८३४।। सो वि पडिवज्जेऊणं तहत्ति पुहईसरस्स आएसं । रन्नाणुन्नाओ उठ्ठिऊण तं तह अणुढेइ ।। ४८३५ ।। कयपाभाइयकिच्चो संवहिउं चंदकित्तिनरनाहो। सह अवरोहेण तहा मणिचूडेणं खयरवइणा ।।४८३६ ।। गंतूणं उज्जाणे पढमं गुणभद्दसूरिणो नमिउं । चिइवंदणाविहाणं पुच्छेइ पढेइ जाणइया ।।४८३७।। जिणभवणगमणकज्जे सूरि आमंतिऊण उठेइ । जाइ तओ जिणभवणे जुयाइदेवस्स सिग्धं पि ।।४८३८॥ गुरुकहियविहाणेणं करेइ चिइवंदणं सपरिवारो। पेक्खेइ तओ निउणं फुल्लहरं सावएहि कयं ॥४८३९।। सिप्पिकरोडाईहिं बहुभंगिकएहि नयणमणहरणं । अवलोयइ बलिकम्म अणेगभंगीहि निम्मवियं ।।४८४०।। एत्तरम्मि पत्तो गुणभद्दमुणीसरो सपरिवारो । अभिवंदिऊण देवे देवाभिमुहो समासीणो ।।४८४१।। कुंकुम-कप्पूरागुरु-चंदणरस-सुरहि-सलिल-संपुन्नं । रयणमयमेगकलसं गिन्हइ सिरिचंदकित्तिनिवो ।।४८४२।। देवस्स दाहिणदिसीए ठाइमणिचूडखेयरिंदो उ । गहिऊण तारिसं चिय कलसं वा मे हवइ भाए ॥४८४३।। वज्जत-बहुविहाउज्ज-वंद-पडिसद्द-पूरिय-दियंतं । ढालंति जिणेसर-बिब-मत्थए दो वि ते कलसे ।।४८४४।! पच्छा आगंतुणं गुणभद्दमुणिंद-वंदणं काउं । दोन्नि वि कत्थइ उचिए ठाणम्मि तओ निसीयंति ॥४८४५।। सेसो पुण न्हवणविही सव्वो वि हु सावएहि निम्मविओ। तयणंतरं तु रइया जिणस्स अंगम्मि वरपूया ।।४८४६।। पारद्धं पेच्छणयं पढमं चंदउरवासिलोएण । विज्जाहरेहि तत्तो विहियं नट्ट मणभिरामं ।।४८४७।। उत्तारिऊण तत्तो आरत्तियमइमहंतवित्थरओ । मंगल-दीवं च तहा वंदति कमेण तो देवं ।।४८४८।। गुणभद्दसूरिणा सह तत्तो तं वंदिऊण सव्वे वि । निग्गंतूणं जिणमंदिराओ ते जंति सट्ठाणे ॥४८४९।। सत्तं पवत्तइ तओ अवारियं चंदकित्तिनरनाहो । एवं अट्ठदिणाइं जाया जत्ता विभुईए ।।४८५० ।। अट्ठमदिणम्मि पडिमा जुयाइदेवस्स फलिहरयणमई । निप्फइउमाणीया तत्थेवयसुत्तहारेण ।।४८५१।। तीसे तत्थ पइट्ठा कारविया वित्थरेण नरवइणा । अइविउलदव्वदाणेण तोसिओ सुत्तहारो वि ।।४८५२।। तं चेव य नवपडिमं जिणस्स आरोविऊण रहमज्झे । भामेइ सयलनयरे महाविभूईए तिन्नि दिणे ।।४८५३।। वित्ताए जत्ताए नेऊणं नियगिहम्मि तं पडिमं । ठावइ विचित्तठाणे दिणाई दस वित्थरेण तओ ।।४८५४।। पूयं बलिं च कारइ तीस पडिमाए चंदकित्तिनिवो । तह सेसजिणहरेसु य कारइ पूर्य कइवएसु ।।४८५५।। निच्चं निच्चं पि तहा जह गेह-जिणिद-पडिम-पूयाए । सह सव्वजिणहरेसु वि दसदिणमज्झे हवइ पूया ।।४८५६।। पढमं घरजिणपडिमं पूएउं वित्थरेण तो जाइ । उज्जाणे जिणभवणे तो वच्चइ सूरि वसहीए ॥४८५७।। तत्तो कयपूएसुं अन्नेसु जिणालएसु वच्चेइ । निच्चं करेइ एवं विवड्ढमाणाए भत्तीए ।।४८५८।। अंते दसाहियाए वित्थरओ संघभोयणं कुणइ । पडिलाभइ वत्थेहि चउविहसंघ पहिट्ठमणो ।।४८५९।। जत्ता सहा य सावयजणं तु सम्माणए विसेसेण । तत्तो बहओ वि जणो जिण-धम्मसमुज्जओ जाओ ।।४८६० सम्माणिऊण तत्तो विसज्जए खेरिद-मणिचूडं । संगामसीहखयरं इंदउरे पेसए रक्खं ।।४८६१!! नमिउं पभावई तो बेथड्ढनगम्मि जाइ मणिचूडो । तेणेव समं वच्चइ खयरो संगामसीहो वि ।।४८६२।। रायाणमणुनविउ विहारमन्नत्थ कुणइ सूरीवि । रायातमणुव्वइउं नियत्तिडं एइ सट्टाणे ।।४८६३ ।। वरजणपडिमं निच्चं तिकालमवि वित्थरेण पूएइ । पइदियहं पि पभाए जुयाइजिणमंदिरे जाइ ।।४८६४।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |