Page Text
________________
१३२
वज्जकुंडलचरियं
तो तेण पेक्खिऊणं गयणाभिमुहं तमेव अणुभणियं । तं कणयकेउकुमरो गिहमज्झगओ सुणेऊण ।।४२४७।। बाहिं निक्खंतो जाव पेक्खए ताव तेण सा दिट्ठा । पविसंती इह भवणे सयमेव पियंकरी तत्तो ॥४२४८।। पट्टविओ हं तीसे हक्कारणकारणेण तेण लहुं । नियगिहमज्झेण तओ समागओ संपइ गिहम्मि ।।४२४९।। तं दासीए गंतुं कणगवईए निवेइयं सव्वं । तीए सयं पि निसुयं गिहमज्झठियाए भन्नत्तं ।।४२५०।। अह कणगवई जंपइ पियंकरिं तं जओ परिन्नाया। मह भाउणा तओ तस्स अंतिए संपयं जाहि ।।४२५१।। किंतु तए कहियव्वं जहट्ठियं ने य अग्गओ तस्स । एयं चिय वत्तव्वं तुहिच्छियं निच्छियं होही ॥४२५२॥ कइवयदिणाण मज्झे अह सा पडिवज्जिऊण तव्वयणं । सह सच्चएण पगया पासम्मिउ कणयकेउस्स ।।४२५३।। सोवालंभं सा कणयकेउणा भासिया जहा भद्दे ! दिट्ठासि गयणमग्गे तं दूराओ मए मंती ॥४२५४।। ता कत्थ गयासि तुमं तीए भणियं गयम्हि तुह कज्जे । सो भणइ तो न किं तं पढमं पत्तासि मम पासे ।।४२५५ सा भणइ सुन्नयाए एमेव गयम्हि कणगवइगेहे । तत्थ गयाए नायं मए तओ तयभिसंकाए ॥४२५६।। न नियत्ताहं तत्तो गिहम्मि तीसे तहेव य पविट्ठा । तीए सह माउसिया मिलणाइ कहं करेऊण ॥४२५७।। जाव किर आगमिस्सं तुह पासे ताव सच्चओ पत्तो । मम हक्कारणहेउं तो तेण सहेह पत्ताहं ।।४२५८।। तो भणइ कणयकेऊ पियंकरि कहसु पत्थुयं इन्हि। सा जंपइ सिज्झिस्सइ कालविलंबेण तुह कज्जं ॥४२५९।। सो भणइ किं तए सा पभावई पभणिया तहा तीए । किं कयमुत्तरमेवं सवित्थरं मज्झ साहेसु ।।४२६० ।। जंपइ पियंकरी तो कवोलवाएण तुज्झ कि सज्झं । बहुणाकएण नियवंछियत्थ सिद्धीए तुह कज्जं ॥४२६१।। तो भणइ कणयकेऊ जं न कहसि वित्थरं तुम मज्झ । जं सुन्नमणासि गया कणगवई मंदिरे पढमं ।।४२६२।। तं मन्नामि न सिद्ध मह कज्जं कि पि तत्थ तुह भद्दे ! ता जह पूव्वं तुमए सवहं दाऊण पुट्ठो हं ।।४२६३।। तह तुज्झ वि देमि अहं सवहे बहुए तुमं सजणयस्स । जणणीए य गुरूणं तह नियकुलदेवयाए य ।।४२६४।। तह कणयचूडरन्नो देवीए तह य कणयरेहाए । देहम्मि कुणसि दोहं जइ सव्वं नेवसाहेसि ।।४२६५।। दिन्नसवहाए तत्तो पियंकरीए जहट्टियं तस्स । अक्खायं निय भणियं पभावई पभणियं तह य ।।४२६६।। सोऊण कणगकेऊ तं चिंतइ दाहगहियसव्वंगो । जाव न दिक्खं गिन्हइ सा अज्ज वि ताव तं झत्ति ।।४२६७।। गंतुं पभावइं अवहरामि जीवामि अन्नहा नाहं । इय चितिऊण संवहइ एस रयणउरगमणकए ।।४२६८।। मणिचूडो वि कुमारो पगुणो अटुमि दिणोवरि होउं । ताव ठिओ जाव दिणं तं चिय गमणस्स संपत्तं ।।४२६९।। तो निय समग्गसामग्गिसंगओ जाव गंतुमारद्धो । सो मणिचूडकुमारो समुट्ठिओ ताव हलबोलो ।।४२७०।। अंतेउरस्स मज्झे जाओ तो रायलोयसंखोहो । धावंति उक्खयाउ हत्था सुहडा सठाणाओ ।।४२७१।। किं किं एयं जायंति जंपिरा जंति रायभवणम्मि । तं सोउं मणिचूडो वि जाइ तत्थेव वेगेण ।।४२७२।। राया वि रयणचूडो कोलाहलसवणओ नियं पुरिसं । अंतेउरम्मि पेसइ पुच्छेउं कलयलसरुवं ।।४२७३।। सो गंतूणं अंतेउरम्मि पुरिसोवबुद्धपरमत्थो। गंतूण रायपासे कहेइ एवं जहा देव ! ॥४२७४।। धूया पभावई तुह जाव सपासायसिहरमारूढा । रयणउरनयरसोहं पासंती चिट्ठए ताव ॥४२७५।। इंदउराओ नयराओ नंदणो कणयचूडरायस्स । आगंतु कणगकेऊ तं अवहरिउं अवक्कतो ।।४२७६।। मणिचूडेण वि एयं पासनिविद्रुण रयणचूडस्स । सोऊण सयं जंतो कुढावए तस्स पट्ठीए ।।४२७७।। राया निवारिओ मग्गिओ य गंतु सयं पि आएसो । तेण अणुन्नाओ पट्ठिओ य सो तस्स पट्ठीए ॥४२७८।। दिट्ठो जंतो सो नहपहेण इंदउरमग्गमुज्झेउं । उत्तरसेढी समुहं मणिचूडेणं कणगकेऊ ॥४२७९।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |