Page Text
________________
कुबेरदत्तरिय
ववसाओ पुण विहलो अणत्थ-फलओ य तस्स संजाओ । केवलपुन्नस्स फलं जायं पुणऽणुपमदेवीए ॥२८७९।। कुमर तह अंबुविचिस्स निवइणो केवलस्स पुन्नस्स। जायं फल महलो पुण जाओ तम्मति ववसाओ ॥२८८०॥ पुन्नं ववसाओ वि य उभयं पुण नंदिवद्धणनिवस्स । समकालफलं जायं रन्नो तह कुंतसीहस्स,।।२८८१।। ता एसिहपरमत्थो कम्म असुहंसुहं च जीवाणं । देइ फलमप्पणो केवलं पि न उणो पुरिसयारो ॥२८८२॥ अन्नह कम्म चिट्ठइ कीरह जइ अन्नहा पुरिसयारो । तो कम्मणाणुरूवं होइ फलं न उण इयरस्स ।।२८८३।। भणियंच--. धारिज्जइ एंतो जलनिही वि कल्लोलभिन्नकुलसेलो। न हु अन्नजम्मनिम्मियसुहाहो दिव्वपरिणामो ।।२८८४।। एवं भणिऊण मुणिम्मि उवरए वंदिऊण तो कुमरो। उट्ठइ कुबेरदत्तो मुणी वि वच्चइ सठाणम्मि ।।२८८५।। एत्थतरम्मि जाया पभायपायानिसा तमप्पसरो । नासइ नहंगणाओ अणागयं सूरकर भीओ ॥२८८६॥ संकोइयकरपाओ विगयच्छाओ खणण संजाओ । कालवसा नासगयं निसंनिएउं निसानाहो ॥२८८७॥ तारायणो वि तारावहम्मि तारावइं गलियतेयं । अवलोइऊण विलयं खेएण व झत्ति संपत्तो ।।२८८८।। जेसि जहिच्छं दिन्नो निसिमयरंदो निसावसाणम्मि । कुमुएहि ते वि बद्धा महुरज्झुणिणो वि भमरगणा ।२८८९। अहवा जडासयाणं देताण वि दाणमइसयमहग्धं । संगो न होइ सुहओ परिणामे सेवयजणाण ॥२८९०॥ पुवदिसाए पत्ता दुई अरुणप्पहा दिणिदस्स । कयकुंकुमंगराय व्व सा वि जाया तयागमणे ॥२८९१॥ आसाओ वियसियाओ अइदूरमसेसभुवणवलयस्स । मित्तम्मि उदयपत्ते कस्सव एवं न संभवइ ।।२८९२।। आसि पणट्ठा पुव्वं दियहस्स विवज्जएण जा लच्छी । लद्धे दियहम्मि पुणो सा जाया कमलसंडस्स ॥२८९३॥ पसरंतकिरणजाले तरणिम्मि तओ निएवि दिसिभायं । पच्छाहुत्तं चलिओ कुबेरदत्तो निवंगरुहो ॥२८९४।। मुणिवयणायन्त्रणसंकिय व्व निद्दापलाइया आसि । जातच्चिरमेतीए कुमरो आलिगिओ गोसे ॥२८९५।। मउलंतनेत्तकमलो वच्चंतो एवमेव सुन्नमणो । खड्डाए खलियपओ पडमाणो जग्गिओ जाव ॥२८९६॥ पच्छइ दिसा विभायं उड्ढो होऊण ताव जाणेइ । अन्नदिसाए लग्गं अप्पाणं तो नियत्तेउं ॥२८९७।। जाव पयट्टिस्सइ किरमंगलउरनयरमग्गसम्मुहओ । ता तस्स वा मग्गाउ धाविओ मत्तमायंगो ॥२८९८।। वणकुंजरजूहाओ गज्जतो दाणसित्तमहिवीढो । उक्खिवियसुंडदंडो दिट्ठिपहे झत्ति ओइन्नो ॥२८९९।। अक्खुहियमणो ठाउं खणमेगं तत्थ चेव तो कुमरो । पासागएगइंदे उप्पइओ गयणमग्गम्मि ।।२९००॥ तस्सेव पट्ठिभाए पडिउं पाएहि पहणिउं गाढं । उत्तिन्नो पुच्छेणं परम्महो धाविउं तुरियं ॥२९०१।। हत्थी वि कुमरपायप्पहारअइमिओ सकोवमणो । पच्छा हुत्तो वलिउं पहाविओ कुमरमग्गेणं ।।२९०२॥ कुमरो वि तस्स आसंदसंतो वयइ पसरियकरस्स । दूरम्मि तओ नेउं नियत्तए झत्ति वामेण ।।२९०३॥ हत्थि वि जानियत्तइ कुमरो गंतूण ताव पुच्छम्मि । तं गिन्हेउं तेणेव सह तओ भमइ चक्कं व ॥२९०४।। तत्तो खणंतरेण आरुहिउं पच्छिमम्मि भागम्मि । खंधम्मि पए काउं झंपं दाउं पुरो ठाइ ॥२९०५।। तत्तो नियत्तिऊणं तयभिमुहो जाव ठाइ सो हत्थी । ताव पुरो पहावइ अइ वेगेणं निवंगरुहो ।।२९०६।। हत्थी वि तयणुमग्गेण धावए जाव केत्तियं दूरं । ताव वलिऊण कुमरो दाहिणभाएण सिग्धं पि ॥२९०७।। गिन्हइ पुणो वि पुच्छे गाढं आयासिऊण तह धरइ। तरइ जहा सो वलिउ न वामओ नेय दाहिणओ ॥२९०८।। मोत्तूण तओ पुच्छं ताडइ पविकढिणमुट्ठिधाएण । पच्छिमजंघा जुयले पुणो वि आरुहइ पट्ठीए ॥२९०९।। एएण पगारेणं पुणो पुणो कह वि तह कओ हत्थी । कुमरेण जहा संतो सो तस्स वसंगओ झत्ति ।।२९१०।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |