Page Text
________________
८८
कुंतसीहरायकहाणयं
कमलसिरी देवीए पुत्तं अह जणइ कुंतसीहनिवो। नामेण रायसीहं गुणेहि जणयस्स परितुल्लं ।।२८१६॥ साहियअसेलसीमालरायसमवायजायजसपसरो । सिरिकुंतसीहराया चिरकालं पालए रज्ज ।।२७१७।। अन्नमि दिणे थेरा समागया के वि तत्थ वाहिम्मि । तेसि वंदणहेउं नयरजणं जाणिउं जंतं ॥२८१८।। राया वि कुंतसीहो तत्थ गओ कोउगेण रिद्धीए । मायामह-मायामहि जणणी-जणयाइ जणजुत्तो।।२८१९।। नमिऊण मुणिदं पंजली तउ उचियठाणउवविट्ठो । आयन्नइ धम्मकहं कहिज्जमाणि मुणिदेण ॥२८२०।। चुलसीइजोणिलक्खे भवे भमंताण कम्मवसगाण । जीवाण माणुसत्तं दुलह धम्मो विसेसेण ।।२८२१।। जुज्झ-जल-जलण-बिसहर-केसरि-करि-रोग-चारगभयाइं । धम्मपभावेण जओझत्ति पणस्संति जंतूण ।।२८२२।। मत्तकरि-तुरय-रहसंकडम्मि सुहडुब्भडम्मि संगामे। पावंति झत्ति विजयं अज्जिय धम्मा नरा पुव्वं ।।२८२३।। जे अणुवज्जियधम्मा तेसि तु कमागया वि रज्जसिरी। अच्छिदिऊण गिज्झइ हढेण केणइ सउन्नेण ।।२८२४।। आयनऊण एवं सिरिहरिसनिवस्स अत्तणो य मिहो। संजायसमरवइयरमणुसरिउ कुंतसीहनिवो ॥२८२५।। आपुच्छइ ते थेरं जह भयवं! पंचगामसयसामी । दुग्गबलेण अजेओ अम्ह पिया आसि इयरेसि ।।२८२६।। निवइण पुहइसीहो एसो एयस्स अंगजाओऽहं । सिरिहरिसो उण राया कमागओ विउलदेसपहू ।।२८२७।। पउरकरि-पुरय-रह-जोहसंजुओ विक्कमी नयपरो य । ता कह एस ममाओ पत्तोभिभवं च मरणं च ॥२८२८।। कह मज्झ रायलच्छी विउला एयस्स संतिया जाया। पसिऊण कहह एयं तुझे जं मुणह सव्वं पि ॥२८२९।। अह ते सुओवउत्ता थेरा होऊण तस्स साहेति । जह देसस्स इमस्सेव अत्थि पच्चंतियग्गामो ॥२८३०॥ तग्गामठक्कुरस्स उ वयंसगा दोन्नि सेवगा आसि । ते आहेडयहेउं अडवीमज्झे परियडंता ॥२८३१।। पासंति साहुजुयलं मग्गपरिभट्ठमग्गओ जंतं । एगो तेसु दुइज्ज भणइ जहा लिंगिणो केइ ॥२८३२॥ एए पहपरिभट्ठा ता एसि दंसिमो नयरमग्गं । इयरेण उ तव्ययणं तस्सुवरोहेण पडिवन्नं ।।२८३३।। पढमो पुरओ गंतुं मुणिणो नमिऊण नयरगामि पहं । दंसइ तेसि बिइओ वि तयणुलग्गो कुणइ एवं ॥२८३४।। पच्छा नियत्तिउमणा अणुजाणावेंति जाव ते मुणिणो । दटू ण जोग्गयं ताव तेहिं साहूहि कहेऊण ॥२८३५।। संखेवेणं धम्म ते भणिया निरवराहजीवाणं । हिंसानिसहमंगीकरेंति तह मंसपरिहारं ॥२८३६।। इय नियमं दाउणं तेसि मुणिणो गया पुरो मग्गे । ते कयनियमा दोन्नि वि नियत्तिउं निय गिहे पत्ता ॥२८३७।। नियम पालताण ताण दिणाइं गयाइं बहुयाइं । अन्नसमयम्मि नायं नियमसरूवं इमं तेसि ॥२८३८।। तग्गामठक्कुरेण पाहुणगे आगयम्मि तो तेण । ते दोन्निवि आइट्ठा हरिणदुगं हणिउमाणेह ॥२८३९॥ चित्तेण विणा दोहि वि पडिवन्नं ठक्कुरस्स तं वयणं । भमिऊण वणे हरिणे दिट्ठ वि हु नो हणिस्सामो ।।२८४०। आगंतुमुत्तरमिणं काहामो अज्ज न हरिणा दिट्ठा । इय चितिऊण दोन्नि वि ते वच्चंता वणाभिमुहं ॥२८४१।। नियनिय मणो विगप्पे पयडंति परोप्परं तओ पुरओ। पत्ता वणे तरुतले दो वि निसीयंति एगत्थ ।।२८४२।। जा चिट्ठति खणद्धं अचलिय पुन्विल्ल सुद्धपरिणामा। ता मयजूहं पुरओ वोलीणं ता (व) दोन्हंपि ॥२८४३॥ जेण पढम दुइज्जो भणिओ मुणिमग्गदसणनिमित्तं । सो निम्विगप्पचित्तो वीओ मयजूहदसणओ ॥२८४४।। चितइ अ कयाएसे अम्हे सामी भणिस्सइ विरूवं । तम्हा परतंताणं नअम्ह नियमो पलइ को वि ॥२८४५।। ता किपि हरिणजूहं मग्गेणिमिणा पुणो वि जइ एइ । ता नूण हणिउमेगं पावेमि पहुपासे ।।२८४६।। दुइयस्स जइ कहिस्संतो मज्झ विहंतुमस नो दाही। ता एयमकहिऊण वि इमस्स साहेमि पहुकज्ज ॥२८४७।। इय चितिऊण चावं चडावियं तेण अत्तणो झत्ति । बीएण पुच्छिओ तो कुणइ इमं उत्तरं एसो ॥२८४८।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |