________________
६१
गिहिधम्मे चंदसेणकहा जय जय जय त्ति नियसेन्निएहिं उग्घोसिओ कुमरविजओ । आउज्जाइं विजयसूयगाइं परिवाईयाई दुयं ॥ ७५० ॥ जयलच्छिसमुवगूढो कुमरो समरंगणस्स मज्झम्मि । कारवइ जयक्खंभं नियविजयपसत्थिनामंकं ॥ ७५१ ॥ तो मंडिलियकलिओ रणरंगे सत्थसल्लियभडाण । कारवइ वणकम्मं मयाण पुण ठावए अग्गिं ॥ ७५२ ॥ भमिरो मरमाणाणं काण वि जलपाणपुव्वयं देइ । कप्पूरमिस्सतंबोलबीडए सल्लियंगाण || ७५३ ॥ उप्पाडाविय अवरे सुहासणेहिं गलंतरुहिरगणे । पेसइ नियए कडए तप्परिपालणकरपयत्तो ॥ ७५४ ॥ कत्थइ रिउरायं पेच्छइ उच्छलियभूसणकरेहिं । विकिरतं पिव रोसुक्करिसा तिव्वयरसरवरिसं ॥ ७५५ ॥ तद्भूलसंठिसंतुलअंगावयवं अईवबीभच्छं । कुमरो सायरसामंतविंदमुद्दिसिय इय भणइ ॥ ७५६ ॥ पिच्छह रोसरयवसा सत्ता अत्ताणयं महाणत्थे । इय निक्खिवंति पररमणिगहणसंकप्पपावहया || ७५७ ॥ परिभावह अणुरायं जो दितो एस तरुणरमणीण । एयावत्थं पत्तो ताण वि सो देइ उव्वेयं ॥ ७५८ ॥ मिउहंसरोमनिम्मियतूलीसयणे सया वि जो सुत्तो । सो तिव्वयरसरसिज्जमुवगओ दूमए सयणे ॥ ७५९ ॥ मुत्तावचूलविलसिरच्छत्तच्छायाए जो सया नमिओ । सो दीसइ आमिसलुद्धगिद्धमंडलकयच्छाओ ॥ ७६० ॥ मसिणियघणघुसिणरसारुणियतणू जो सुहं पयच्छंतो । सो उव्वेयं वियरइ खरंटिओ रुहिरधाराहिं ॥ ७६१ ।। वीइज्जतो तरुणीहिं जो सया सेयचामरेहिं सो । वीइज्जइ नियबलरेणुपवणचलसीसकेसेहिं ॥ ७६२ ॥
Jain Education International
For Private & Personal Use Only
www.jainelibrary.org
