________________
७३१
पयावसुंदरनिवकहा तिव्वप्पयावपन्भारनयसव्वरिवूनिवो । पयावसुंदरो नाम कामिणी मणमोहणो ॥ ९३९५ ॥ पिया मणप्पिया तस्स अस्थि उव्वणजुव्वणा । सोहग्गसुंदरी नाम सीलसिंगारहारिणी ॥ ९३९६ ॥ तत्थेव य नयावासा संति संतोससुंदरा । गरिट्ठा सेट्ठिणो दुन्नि माणणीया निवस्स वि ॥ ९३९७ ॥ सीलसारो त्ति ताणेक्को धम्मसारो दुइज्जओ । सीलदेवि जसोदेवि नामं तेसिं पिया दुगं ॥ ९३९८ ॥ तिसंझं वीयरायस्स पूयं कुव्वंति सेट्ठिणो । वंदंति गुरुणो गंतुं सव्वया वि उवस्सए ॥ ९३९९ ॥ जम्मणं जीवियव्वं च नरत्ताइगुणन्नियं ।। कयत्थं मन्नमाणा ते धम्मं कुव्वंति सायरं ॥ ९४०० ॥ सम्मत्ते निच्चलं चित्तमुव्वहंताण दोन्ह वि ।। गच्छंति वासरा तेसिं कयत्था तत्तजोगओ || ९४०१ ॥ अन्नया य नहुच्छंगे दुंदुही झुणिमुत्तमं । वीणावेणुरवुम्मिस्सं गीयं पि हु सुणंति ते ॥ ९४०२ ॥ तो कोऊएण नेत्ताई निक्खिवंति नहं पइ । पेच्छंति य सियछत्ततिरोहियरविप्पहं ॥ ९४०३ ॥ सयमेव ढलंतेहिं चामरेहिं विराईयं । सुरासुरेहिं सव्वत्तो सायरं सेवियक्कम ॥ ९४०४ ॥ अईए पडुपन्ने य भविस्से य मणोगए । संसए सव्वलोयाणं छिंदंतं हत्थमेव य ॥ ९४०५ ॥ सुवन्नकमलासीणं नियसिस्ससमन्नियं । आगच्छंतं नहुच्छंगे वुड्ढं ससगिहट्ठिया || ९४०६ ॥ (कुलयं) पुरलोयाण सव्वेसिं उप्पायंतो कुऊहलं । आवासिओ सउज्जाणे नमिज्जंतो दुमेहि वि ॥ ९४०७ ॥
Jain Education International
For Private & Personal Use Only
www.jainelibrary.org
