________________
७२२
सिरिअणंतजिणचरियं
एगिदियाइपंचिदियंतसत्तोहविहियसंहारं । दवदाणं नरयकरं पयत्तओ परिहरेयव्वं ॥ ९२८० ॥ नो जणधणगाईणं धन्नाणं वावणत्थमायरइ । सरहदहतलायसोसं सड्ढो जलयरकयविणासं ॥ ९२८१ ॥ कुक्कुर-वानर-मज्जार-सारिया-कीर-कुक्कुडाईणं । परिपालणं मुयंतो असइपोसं च पइसड्ढे ॥ ९२८२ ॥ उवभोगपरीभोगच्चयमेयं तुज्झ साहियं इण्हि । आयन्नसु अक्खेमो अणत्थदंडव्वयं तइयं ॥ ९२८३ ॥ चउहा अणत्थदंडो अवज्झाणं तह पमायआयरियं । हिंसप्पयाणमहपावरूवउवएसदाणं च ॥ ९२८४ ॥ एगिदियाइ सत्ताण रक्खणं जत्थ तं भवे झाणं । सेसं तु अवज्झाणं विचिंतणं अट्टरोद्दाणं ॥ ९२८५ ॥ मज्जाइपंचभेयप्पमायवसयस्स जमिह पुरिसस्स ।। जायइ विवेगट्ठियं तं पमाय आयरियमिइ भणियं ॥ ९२८६ ॥ मुसलुक्खलक्खग्गहलग्गिकुसयविसकुंटिपमुहवत्थूण । दाणं हिंसपयाणं ति भणिएणत्थहेऊण ॥ ९२८७ ॥ किं चिट्ठह उवविट्ठा न दमह वसहे न खेडह हलाई । ईय परउच्छाहणओ गीओ पावोवएसो त्ति ॥ ९२८८ ॥ एवमवज्झाणपमुहचउविहस्स वि अणत्थदंडस्स ।। विरईए होइ तइयं गुणव्वयं भव्वसड्ढाण ॥ ९२८९ ॥ कंदप्पं कुक्कुईयमोहरियं संजुयाहिगरणं च । उवभोगपरीभोगाइरेगमवि वज्जए सड्ढो || ९२९० ॥ एए पंचइयारा सामन्नेणं पयासिया तुज्झ । साहिप्पंतं इण्हि आयन्नसु ताणमेक्केक्कं ॥ ९२९१ ॥ गुरुरायरसियहियएण मयणउद्दीवणेहिं वयणेहिं । सह रमणीहिं न कज्जो परिहासो सावयजणेण ॥ ९२९२ ॥
Jain Education International
For Private & Personal Use Only
www.jainelibrary.org
