________________
४७६
सिरिअणंतजिणचरियं
तो चिंतइ नरनाहो जायं अंतेउरं महप्पउरं । तेण य सह विसयसुहं उवभुत्तं चिरंतरं कालं || ६१०० ॥ नीरोगत्तं नवजोव्वणं च इंदियपत्तमइभोगो । सुयजम्मकारणाई जायाई मज्झ विहलाई || ६१०१ ॥ साणुसयासीमाला कारविया जे मए हढेणाणं । ते कइया वि जलिस्संति नूण उट्ठहियजलण व्व ॥ ६१०२ ॥ नो रायवीयमेत्तं पि अस्थि गोत्ते वि चिट्ठठ कुले मे । ता कह मज्झ परोक्खे पया वराई सुहं लहिही ॥ ६१०३ ॥ मह पिउपिया महाईहिं पालिउं जा पया कया सुहिया । ता मज्झ वि तदुवेहा न जुज्जए किं तु हियकरणं ॥ ६१०४ ॥ तो जुत्तं मह साहसमवलंबेउं पमायमुज्झेउं । ता कत्थ कज्जसिद्धी जाणत्थे खिप्पइ न अप्पा ? ॥ ६१०५ ॥ इय सुयअलाहचिंतासंताणवसेण नरवई जाओ । दूरं दुब्बलदेहो परिपसरियरायमंदो व्व ॥ ६१०६ ॥ कईया वि पसुत्तो जाव जग्गए जामिणीए जामजुगे । सकरुणसरं रुयंति ता आयन्नइ कमवि रमणि ॥ ६१०७ ॥ तस्सरमणुसरिउं मणो दोला पल्लंकमुज्झिउं जाव । उट्ठइ राया पेच्छइ ता सुत्तं जामइल्लजणं ॥ ६१०८ ॥ चिंतइ पासायोवरि मन्नुसमम्मं सरं रुयइ रमणी । उप्पायंती मज्झ वि दुक्खभरं ता तमिक्खेमि ॥ ६१०९ ॥ इय चिंतिउं कडीतलं निबद्धअसिधेणुओ गहियखग्गो । आरूढो पासायग्गसत्तमं भूमि य भूवो || ६११० ॥ जग्गंति जाव ते जामइल्लया ता नियंति नो निवई । तो हत्थो खालाइट्ठाणेसु वि जा न सो दिट्ठो || ६१११ ॥ ता संखुद्धा सव्वे मूढा कायव्व विसयवावारे । जंपति सो विदल्लं सुद्धं ते नियसु निवई ति ॥ ६११२ ॥
Jain Education International
For Private & Personal Use Only
www.jainelibrary.org
