________________
॥ णमोऽत्थु णं महइ महावीर-वद्धमाणसामिस्स ॥ सिरिअम्मएवसूरिविणेयसिरिनेमिचंदसूरिविरईयं सिरिअणंतसामिजिणचरियं
(पढमपत्थावो) मंगलं जयइ जुगाइजिणिंदो, परिविलसिर-समवसरण-चउ-रूवो । वागरिडं पिव सुह-दाण-सील-तव-भावणाधम्मे ॥ १ ॥ सो जयइ जिणोऽणंतो, देसण-दसणंसुणो सया जस्स । केवलरविकिरणा इव, तममवर्णिता वियंभंति ॥ २ ॥ सिरिवद्धमाणसामि, नमामि कणयाभदेहदित्तीए । कुणमाणं पिव भुवणं, सव्वं पि हु अत्तणो तुल्लं ॥ ३ ॥ सेसा वि जयंतु जिणा, सद्देसणअमयपसरसेएण । कयपसमा भुवणस्स वि, अप्पसमत्तं कुणंता वि ॥ ४ ॥ चरिएक्कउत्तमंगे, विलसंतदुवालसुत्तमंगे वि । वंदामि गणहरिंदे, अविग्गहे मणहरंगे वि ॥ ५ ॥ जयइ सरस्सइदेवी, मुत्ताहल-सिय-सरीर-कंतीए । जणमोहतमोहरणं, नाणालोयं पिव कुणंती ॥ ६ ॥ रयणायर व्व गुरुणो, जयंतु सुपसिद्ध-सुर-सुहाहारा । जेसि नरा पयसेवाए हुंति परमत्थसत्थकरा ॥ ७ ॥ इय थोअव्वत्थुइजायसुकयसंभारविद्दवियविग्यो ।। पारद्धसत्थनिप्फत्तिमंगलं लहुं लहिस्सामि ॥ ८ ॥ (पुव्वगंथकारपरियाणं सुमरणं) सो जयइ गोयमो, गोयमो व्व गुरुपव्वयाहियनिवासो । जस्स सुरयणाहारो, भंडागारो व्व सिद्धंतो ॥ ९ ॥ सिरिहरिभद्दमुणिंदो, रिउ-पयरणकरणविजयजायजसो । सुहडो व्व सया सोहइ, सव्वुत्तमवीरपयलीणो ॥ १० ॥
Jain Education International
For Private & Personal Use Only
www.jainelibrary.org
