________________
रिठणे मिचरिउ
१९२
तो तेण तरुणि-तरणुववण्णे हरि वारहहिं विद्ध कण्णे णउइहिं णरु णरेण अपमाणेहिं पुणु सएहिं पुणु अट्ठाणउइहिं वण-वियणाउरु रुहिर-जलोल्लिउ णं अकाले कंकेल्लि पफुल्लिउ कड्डइ चक्कु ण सुमरइ पहरणु जिंदइ धम्मु ण धम्में कारणु भारु भारु जो दिण्णु सुवण्णहो सो गउ कासु वि पच्छए अण्णहो जइ णिक्खत्तउ धम्मु सहेज्जउ तो किं मइं रणे जिणइ धणंजउ
घत्ता रुहु कड्ढि कण्ण जइ सक्कहि वोल्लावइ गंडीव-धरु। उप्पज्जइ णेहु सहावेण जइ-वि ण जाणइ भाइ णरु॥
[२०] णिएवि अजुज्झमाणु पिह-णंदणु तो पभणइ सामरिसु जणद्दणु हणु हणु कवणु खत्तु सहुं आएं जसु उप्परि अक्खत्ति किय राएं जेण कुमारहो गुणु दोहाइउ जेण घुडुक्कउ सत्तिए घाइउ तहो अवराह-दुमहो फलु दावहि छिंदि छिंदि सिरु काई चिरावहि तो छव्वाण-पमाणे वाणे विद्धु धणंजएण तुरमाणे जइ तुहं सरु गंडीवु सरासणु जइ हउं अज्जुणु हरि गरुडासणु धम्म-पुत्तु जइ धम्म-वियाणउ . तो सिरु लेजहि पत्त-पमाणउ एम भणेवि विसज्जिउ पत्थें पाडिउ उत्तमंगु दिव्वत्थें
घत्ता तहिं काले कवंधु सइत्तउं रुहिर-पवाहें चच्चियउं। सिरु सामिहे महि णिव-भाइहे देप्पिणु णाई पणच्चियउं ।।
[२१] णिवडिउ अंगराउ महि-मंडले दिण्णई जय-तूरइं पंडव-वले वहिरिउ भुवणु संख-णिग्घोसें णच्चिउ भीमसेणु परिओसें
४
Jain Education International
For Private & Personal Use Only
www.jainelibrary.org
