________________
चउत्थो पत्थावो
इह जंबुदीव-भरहे मज्झिम-खंडम्मि कुसउरं नयरं । जत्थ रणो सद्दो च्चिय मयणो च्चिय वुच्चए मारो ||३८१।। तत्थ जिण-चलण-भत्तो वर-सत्तो साहु-सेवणासत्तो । नीसेस-दोस-चत्तो दत्तो नामेण आसि वणी ।।३८२।। तस्स य भज्जा पउम त्ति बाल-वालंकि-वाल-कडिल-मणा । सो तीए सह विसए सेवंतो गमइ दियहाइं ।।३८३|| तीए न अत्थि पुत्तो दुम्मइ हिययम्मि तेण सो दत्तो । तत्तो मायंदिपुरी-वत्थव्वय-माणिभद्दस्स ||३८४|| धूयं निरूवम-रूवेण तिलयभूयं समत्त-रमणीणं । जिण-धम्म-वासिय-मणं भई नामेण परिणेइ ।।३८५।। सा विसय-वासणा-संगया वि विसएसु न दढमणुरत्ता | परलोय-तत्ति-वज्जिय-मणा वि परलोय-तत्ति-परा ।।३८६।। कालेण समुप्पल्लो भद्दाए सयल-गुण-जुओ पुत्तो । तह वि पउमाइ पणयं बहुययरं दसए दत्तो ||३८७|| सा उण अतित्त-चित्ता भद्दाए उवरि मच्छरं वहइ । सित्ता वि हु दुद्वेणं कडुय च्चिय तुंबिणी जम्हा ||३८८।। सुभगो त्ति वहइ गव्वं एक्वो च्चिय मच्छरो जए सयले । हिययाओ खणं पि न जो ओसरइ समग्ग-रमणीणं ||३८ ।। चिंतेइ इमं पउमा संपइ मह देइ पिययमो माणं । सुय-जणणि त्ति पमाणं कमेण होही तह वि भद्दा ||३१०।। ता जह न होइ एसा पमाणभूया तहा करिस्सामि । तत्तो कवडपहाणा रहसि परिव्वाईया तीए ||३११।। सम्माण-दाण-पुव्वं भणिया भयवई ! इमं उवाएण । मह 'हियय-सल्ल-तुल्लं घराओ निस्सारसु सवत्तिं ||३१२।। तीए वि हु पडिवल्नं तव्वयणं दव्व-लोह-विवसाए । अविवेक-विहुर-हियया किमकज्जं जं न कुव्वंति ? ||३१३||
Jain Education International
For Private & Personal Use Only
www.jainelibrary.org
