________________
૨૨૪
सिरिसोमप्पहसूरि-विरइयं विसउवभोग-भोलविय-चित्तु चारित्तु वच्छ ! वजिवि पवित्तु । बहु पाव कुणंतु अणंतु कालु भवरग्नि सहिस्ससि दुक्ख-जालु ।।२२५०।। अवगणिवि नरय-दुहु अप्पमेउ जं विसय समीहसि निव्विवेउ । अणवेक्खिय लउड-पहारु लुन्दु तं वच्छ ! बिडालु व पियसि दुन्दु ।।२२५१।। सिद्धंतु पढसु परमत्थं सुणसु चल-करणग्गाम-निरोहु कुणसु । मण-मक्कड-नियमण-संकलाओ परिभावसु बारस भावणाओ ||२२५२।। चलु जीविउ जोव्वणु धणु सरीरु जिंम कमल-दलग्ग-विलग्गु नीरु । सुविणिंदयालसमु पिय-पसंगु मा वच्छ ! कुणसु चारित्त-भंगु ।।२२५३।। पिउ-माय-भाय-सुकलत्त-पुत्तु पहु परियणु मित्तु सणेह-जुत्तु । संपत्तइ मरणि न कोवि सरणु परिपालसु निच्चल-चित्तु चरणु ।।२२५४।। राया वि रंकु सयणो वि सत्तु जणओ वि तणओ जणणि कलत्तु । भवरंगि नडु व बहुरुवु जंतु पेच्छेवि म मुज्झसु तवु वयतु ।।२२५५।। एकल्लउ८ पावइ जीव जम्मू एकल्लउ मरइ विढत्त-कम्म् । एकल्लउ परभवि सहइ दुक्खु इय सुणिवि म वंछहि विसय-सुक्खु ।।२२५६|| जहिं जीवह पउंजिअत्तु देहु तहिं किं न अन्नु धणु सयणु गेहु । इय जाणिवि गय-विसयाभिलासु तुहु वच्छ ! होहि संजमि दढासु ।।२२५७|| वस-मंस-रुहिर-चम्महि-बद्ध नव-छिड्ड-झरंत-मलावणद्ध । असुइस्सरुव-नर-थी-सरीर परिभाविवि संजमु धरहि धीर ||२२५८।। मिच्छत्त-जोग-अविरइ-पमाय-मय-कोह-लोह-माया-कसाय । पावासव सव्वि वि परिहरेसु चारित्ति चित्तु निच्चलु करेसु ||२२५१।। जह मंदिरि रेणु तलाइ वारि पविसइ न वच्छ ढक्विय-दुवारि । पिहियासवि जीवि तहा न पावु इति चिंतिवि थिरु करि चरण-भावु ।।२२६०।। परवसु अनाणु जं दुहु सहेइ तं जीयु कम्मु नणु निज्जरेइ । बहु खव्वइ जिइंदिउ तवु चरंतु इय चिंतिवि चिहसु वउ धरंतु ।।२२६१।। जहि जम्मणु मरणु न जीवि पत्तु तं नत्थि ठाणु बालग्गु मत्तु । उड्डाहो चउदस रज्जु लोगि बुज्झतु म मुज्झहि चरण-जोगि ||२२६२।।
For Private & Personal Use Only
Jain Education International
www.jainelibrary.org
