________________
૨૩૬
सुमइनाह-चरियं
इंतं महिड्डियं पणिवयंति पुव्वागया सुरा तत्थ । पुव्वागयं तयं पुण पणमंता चेव वच्चंति ||१५५०।। मुक्व-परोप्पर-वेरा तिरिया मज्झम्मि ठंति बीयस्स । सालस्स तईअस्स उ मणुयामर-वाहण-समूहा ||१५५१।। अह सोहम्म-सुरिंदो भयवंतं पणमिऊण भत्तीए । पुलयालंकिय-काओ कयंजली थोउमाढत्तो ||१५५२।। जय सिवपुर-पह-संदण नंदण नीसेस-गुण-सुरतरूण ! | मेह-नरनाह-नंदण ! जय नयणानंदण ! नमो ते ||१५५३।। पणमामि सामि ! तुह पाय-पंकयं जम्मि मत्थय-निहित्ते । सिद्धि तरुणी सयण्हं कडक्खलक्खी कुणइ पणयं ।।१५५४|| भुवणेक्कवीर ! तुमए सरीर-दुग्गाओ भावरिउ-वग्गो । चिरमन्नपाण-रोहं काउं निव्वासिओ सव्वो ||१५५५।। अन्नोन्न-गाम-धणहरण-जणिय-संगाम-बद्धवेरा वि । चिटंति तुह सहाए भूवइणो निद्ध-बंधु व्व ||१५५६।।
आयडिऊण केसरि-करं करी निय-करेण निस्संकं । कंडुयइ कवोल-तलं तुह परिसाए इमो नाह ! ||१५५७।। एगत्थ इमो महिसो महिसं व सहोअरं सिणेहेण । लिहइ हयं हेसंतं पुणो पुणो नियय-जीहाए ||१५५८।। उड्मुहो उन्नामिय-कण्णो लीला-विलोल-नंगूलो । हरिण-जुवा इत्थ घणं घाणेणऽग्घाइ वग्घ-मुहं ||१५५१।। मूसयमेसो पासेसु अग्गओ पच्छओ अ ललमाणं । निय-बालयं व चुंबइ बहुं बिडालो इह सिणिद्धो ||१५६०।। फण-फलयमारुहंतेण संचरंतेण चउसु वि दिसासु । नउलेण समं खिल्लइ सप्पो सप्पहरिसो एसो ||१५६१।। अन्ने वि जए जे निच्चवेरिणो ते वि वेर-परिचत्ता । चिटंति एत्थ तुमए कय-उवसम-संविभागो व्व ||१७६२।। इय थोऊण जिशिंदं इंदाणं अच्चुइंद-पमुहाणं । मज्झम्मि निविहो भालवट्ठ-विहियंजली सक्को ||१५६३।।
Jain Education International
For Private & Personal Use Only
www.jainelibrary.org
