________________
૨૧૨
सिरिसोमप्पहसूरि-विरइयं नवमं पुण सम्मत्तं समत्त-संकाइ-दोस-परिचत्तं । दसमं व नाण-दसण-चरित्त-उवयार-विणएहिं ।।५।।१३०५।। एगारसमिज्जाईय अवस्स-किच्चाईयार-परिहरणं । बारसमिह मूलुत्तर-गुण-परिपालणमणईयारं ||६||१३०६।। तेरसमपमाएणं पइक्खणं पइलवं सुहं झाणं । चउदसमणवरयं चिय दुवालसविहं तवच्चरणं ||७||१३०७।। पनरसमन्नाईणं संविभागो तवस्सि-लोगम्मि । सोलसमायरियाइसु वेयावच्चं सुसत्तीए ||८||१३०८।। सत्तरसं संघस्स उ समाहिकरणं अवायहरणेण । अट्ठारसं अउव्वाण सुत्त-अत्थाण संगहणं ||9||१३०१।। एगूणवीसमवितह-सद्दहणुवित्तणेहिं सुय-भत्ती । वीसं पभावणा सासणस्स वायाइ-लद्धीहिं ||१०||१३१०।। एएहिं ठाणेहिं तित्थयरत्तं उवज्जिऊण इमो । विहरइ चिरं महीए पडिबोहंतो भविय-लोयं ।।१३११।। संलेहण-दुग-पुव्वं पज्जंतावसरमप्पणो नाउं | काऊण अणसणं पायवोवगमणेण सुद्धमणो ||१३१२।। मरिऊण वेजयंते सुरो विमाणम्मि सो समुप्पन्नो । सुह-सागरावगाढो तेत्तीसं६७ सागरे गमइ ||१३१३।। सिरि-सोमप्पहसूरीहिं विरइए सुमइसामि-चरियम्मि । तित्थयर-कम्म-अज्जण-पवरा नर-सुर-भवा भणिया ||१३१४||
Jain Education International
For Private & Personal Use Only
www.jainelibrary.org
