________________
सिरिभुयणसुंदरीकहा ॥ गंतूण गुरुसमीवं कयप्पणामेहिं रायपमुहेहिं । दिन्नासणेहिं सविणय-मुवविटुं हिट्ठहियएहिं ॥८१४।। पुट्ठो कुलवइणा वि हु ‘राया! कुसलं?' ति, तुह पसाएण । मह कुसलं ति मुणीसर !, नरवइणा कुलवई भणिओ ।।८१५।। अह सजलजलहरोरालिगहिरमहुरक्खराए वाणीए । उद्दिसिऊण नरिंदं कुलवइणा भणिउमाढत्तं ।।८१६।। भुयणाहिवस्स नरवइ भुयणुवयारेकुदिन्नहिययस्स । परदुहदुहियस्स न किंपि अत्थि जं ते अकहणीयं ।।८१७।। कह तम्मि समप्पिज्जइ दुहभारो जो न होइ समहियओ? । दोलादंडो व्व न जो उभयस्स वि कुणइ समदुक्खं ॥८१८॥ . कहियम्मि निययदुक्खे जइ वि दुही होइ सज्जणो तहवि । कहियव्वं जेण दुवे तदुवसमविहीए लग्गति ।।८१९।। तम्हा तुह कहियव्वं जओ महादुक्खजलहिपडियाण । अम्हाण पुन्नघडिओ नरिंद ! तं जाणवत्तं व ॥८२०॥ जं दिटुं जं च सुयं जं नियनाणप्पहावओ नायं । तं चंदसिरीचरियं कहेमि अच्छरियसंजणणं ।।८२१।। इह अत्थि भरहवासे नासिकं नाम पुरवरं रम्मं । नीसेसनयरगुणगण-विहूसियं ऊसियपडायं ।।८२२।। अइगहिरमहाफरिहा-जलबिंबियभुयणवियडपायारं । पायालपुरं नरलोय-दंसणत्थं व नीहरइ ।।८२३।। जं बहुपासायसयग्ग-भूमियाकयगवक्खलक्खेहिं । नियइ व्व कोउहल्ला नियसोहं विमलनयणेहिं ।।८२४।।
Jain Education International
For Private & Personal Use Only
www.jainelibrary.org
