________________
सिरिभुयणसुंदरीकहा ॥
चलिओ चलंतमुणिवइ-पटुवयणनिवेइयग्गसममग्गो । पत्तो कुलवइउडवग्गसंठियं मंडवं गरुयं ॥७५९।। पुव्वोवविठ्ठकुलवइ-समीववरविट्ठरे अणुन्नाओ । नमिऊण कुलवई(इं) अह नरेसरो आसणम्मि ठिओ ।।७६०॥ तयणंतरं च सयलो-वविठ्ठतावसजणम्मि कुलवइणा । संभासिओ नरिंदो सरीरसुहकुसलवयणेहिं ।।७६१।। । तेणा वि समोणयसिरनिहित्तकरमउलिकयपणामेण । अज्जं चिय मह कुसलं तुम्ह पसाएण इय भणियं ।।७६२।। परमत्थि किंपि भयवं ! भणियव्वं सव्वहा मह पसायं । काऊण सुणह एयं विन्नत्तिं अकयमणकोवा ।।७६३।। गुरुणा समणुनाओ भणइ नरिंदो मुणिंद ! मह अज्ज । पढमं चंदप्पहदेव-दंसणे वियलियं पावं ॥७६४।। तयणंतरं च भयवइ-पणामसंपत्तपुण्णअणुहावा । तुह दंसणं मुणीसर ! संजायं पावपडिहणणं ॥७६५।। पच्छा नीसेसमुणिंद-विंदमुहकमलदसणेण महं । भयभीयं पिव पावं सहसा असणीहूयं ॥७६६।। इय एवमाइबहुविह-सुहकारणकलियपुन्नरासिस्स । एयं चिय मह हियए अणुचियमिव कुणइ संतावं ॥७६७।। नीसेसभुवणपुज्जा तुब्भे मह एत्तियं जया कुणह । गौरवमगौरवपए तुब्भेहिं तया अहं ठविओ ||७६८।। जो पूयाणं पूया-अइक्कमो होइ सो तया तस्स । चिरसंचियमवि पुन्नं पहणइ आगामुयं दूरे ।।७६९।।
Jain Education International
For Private & Personal Use Only
www.jainelibrary.org
