________________
७४९
सिरिभुयणसुंदरीकहा ॥
‘एवं होउ' त्ति तओ गरुयनिबंधेण मन्नए कुमरो । जक्खो सह उप्पइओ कुमरेणं तुब्भ(च्छ)परिवारो ।।८२११॥ हरिविकुमेण भणियं ‘वच्चामो ताव वंतरसुरस्स । पासे तं अणुकूलं काउं जामो अलंघउरं' ।।८२१२।। तो भणइ जक्खराया 'नेवं नरनाह ! रायनीईए । जेणेव सह विरोहो सो च्चिय साहिज्जए पढमं ॥८२१३।। तं साहंतस्स पुरो जो काही राय ! तुज्झ पडिबंधं । पच्छा तेण समाणं जं होही तं करिस्सामि' ॥८२१४।। ‘एवं' ति पभणिऊणं विउरुव्वियवरविमाणमारूढो । हरिविकूमो सखग्गो किरीडमणिकुंडलाहरणो ।।८२१५।। वच्छत्थलघोलिरहारभूसिओ सूरभासुरपयावो । उभयंसजक्खचालियसियचामरभूसियदियंतो ।।८२१६।। तो अत्थमिए सूरे समइक्वंतंमि रयणिपढमद्धे । सुत्तमि सयललोए मूईहूए व्व भुयणंमि ।।८२१७।। जोइज्जंतो कुमरो अयंडसंजायदिवससंकाए । सिरिवेरिसिंहसेणालोएहिं सुदूसहालोओ ।।८२१८।। विउरुव्वियजक्खपयंडतेयपयडीकयं नियं सेन्नं । कुमरो अवलोयंतो अलंघनयरंमि संपतो(त्तो) ।।८२१९।। तो नियतेयपयासियपासायसहस्ससोहियं नयरं । दिव्वविमाणारूढो पेच्छइ हरिविकुमकुमारो ||८२२०।। दूराओ च्चिय सिरिवैरिसीहसेन्नेण वेढियउवंतं । पडिसिद्धिंधण-धण-धन्न-जवस-जल-निग्गम-पवेसं ।।८२२१।।
Jain Education International
For Private & Personal Use Only
www.jainelibrary.org
