________________
सिरिभुयणसुंदरीकहा ॥
७४१ ता परमत्थसरूवं अंबावयणं न मज्झ एगं पि । संपन्नं पावाए किलिट्ठकम्मोदयवसेण ।।८१२३।। जइ वि निसिद्धो समए अप्पवहो तह वि दुहसउवि(वि)ग्गा । केण वि नएण एत्थं अरन्नमज्झे मरिस्सामि ।।८१२४।। दोहग्गदूसियाणं दुल्लहजणजायनिबिडनेहाण ।। खंडियअहिमाणाणं मरणं चिय. ओसहं ताण' ।।८१२५।। इय भुयणसुंदरी कुमरविरहपम्हुसियनिम्मलविवेया । उज्जाणाओ तुरियं नीहरिया मरणबुद्धीए ।।८१२६।। चिंतइ 'तत्थ गमिस्सं जत्थ करिंदाओ रक्खिया तेण । पायं तंमि पएसे सो होई(ही) वारणाहिवई ।।८१२७।। तस्स पुरो अप्पाणं खिविऊणं सरिय जिणनमोक्कारं । एयं दुक्खावासं परिचइस्सामि नियदेहं' ।।८१२८।। इय नीलुप्पलनयणा कमलमुही गुरुपओहरक्ता । पसरंतसुरहिसासा भमइ व्व वणं सरयलच्छी ।।८१२९।। तत्थागया भमंती अदिट्ठवणवारणा विचिंतेइ । 'बहुपावाए न दरिसइ अप्पाणं सो वि मह हत्थी ||८१३०।। हा हा ! अहं अधन्ना जं जं इच्छेमि दुल्लहं तं तं । सुलहं पि जओ मरणं तं पि य मह दुल्लहं जायं' ।।८१३१ ।। इय मरणज्झवसाय(या) ताव गया जाव जोयणा दोन्नि । पेच्छइ अगाहसलिलं अह पुरओ जलनिहिं बाला ।।८१३२।। जो फेणपडलपंडुरसमुच्चकल्लोलदीहबहुवलओ । कयफालिहबहुसालो रक्खइ रयणाई भीओ व्व ।।८१३३।।
Jain Education International
For Private & Personal Use Only
www.jainelibrary.org
