________________
६६
सिरिभुयणसुंदरीकहा ॥ नयणनईसु य जिस्सा वाहो इव पविसिऊण पंचसरो । मज्जइ मोत्तूण तडे भूजुवलमिसा वणलयं व ॥७०६।। वयणस्स अलंकारव्व तीए दीसंति सुंदरा दसणा । सुसिलिट्ठकंतिसमया सुसमाहियतेयगुणकलिया ॥७०७।। जीसे सहावसुंदर-मुहम्मि अहरो निसग्गसोणपहो । कमलट्ठिओव्व सोहइ रत्तुप्पलपत्तसंघाओ ।।७०८।। सोहंति जीए सवणा नयणनइपवहपडिहयप्पसरा । भूडंडग्गठियां इव मयणमहावाहपासव्व ॥७०९।। इय जं जं चिय दीसइ सरीरगयमेत्थ अवयवसरूवं । कप्पलयाए व सव्वं तं तं मणनिव्वुइं कुणइ ।।७१०।। सव्वंगेसु वि अइमहुर-सरस-रमणीयगुणमहग्घविया । उवभोगसुहासायण-मणोहरा इक्खुलट्ठिव्व ॥७११।। उत्तमकुलप्पसूई तत्थवि रूवं च तं पि गुणकलियं । आमरणंतो नेहो जुवईण सुदुल्लहं मिलियं ।।७१२।। ता जुवइरयणमेयं संभवइ न जत्थ तत्थ इय रूवं । कहमिव वणम्मि निवसइ सपच्चवायम्मि, अच्छरियं ।।७१३।। एत्थंतरम्मि एगा समागया तत्थ मज्झिमवयत्था । तावसवेसा जुवई परिवियडकमंडलुकरग्गा ।।७१४।। अइमसिणवकुलंसुय-नियंसणा वक्कलंगपंगुरणा । विविहतवसुसियदेहा पच्चक्खा तावससिरिव्व ॥७१५।। पयपयनिविठ्ठदिट्ठी बहुतावसनिवहसिक्खणसयोहा । अहिधावमाणवणयर-पयडियपडिवालणपसाया ।।७१६।।
Jain Education International
For Private & Personal Use Only
www.jainelibrary.org
