________________
७०७
सिरिभुयणसुंदरीकहा ॥
दठूण मिहुणयाई नियपडिबिंबाई व[फ]लिहभित्तीसु । जणसंमद्दभएण व सुरयसुहं नाणुसेवंति ॥७७४८॥ समुहट्ठियाण अन्नोन्नभित्तिसंकंतदिट्ठरूवाण । सुव्वइ परनर-नारीभमेण कलहो मिहुणयाण ||७७४९।। कत्थ वि घणविदुमसोणकिरिणवित्थारभरियदिसिचक्कं । संज्झासमयजिणच्चणसंमोहं जणइ जक्खाण ॥७७५०।। कसणिंदनील-मरगयमऊहमंसलियएकपेरंतं । निबिडंधयाररयणीवामोहं कुणइ जक्खाण ॥७७५१।। बहुकक्केयण-घणपुस्सरायकिरिणोहरंजियदियंतं । वहइ पओसे वि पहायसमयसंकं सुरवहूण ||७७५२।। इय तं मणोभिरामं भवणं सिरिमलयमेहजक्खस्स । पेच्छंती चंदसिरी सच्चविया जक्खविलयाहिं ॥७७५३।। अच्चभु(ब्भु)यचंदसिरीसरीरसोहग्गदंसणरसेण । अवरोप्परेण तासिं संजाया बहुविहवियप्पा ।।७७५४।। 'देवि व्व सावभट्ठा किं वा दणुसुंदरी(रि) व्व इह पत्ता । विज्जाहरि व्व एसा आणीया जक्खराएण ||७७५५।। का होज्ज? कस्स एसा? किं वा इह केण वा वि कज्जेण । संपत्ता? अच्चब्भुयनियरूवुप्पाइयाणंदा ।।७७५६।। अवलोइयं तिलोए रूवं नियरूवसन्निहमिमीए । न य दिटुं पुण इहई समागया कोउहल्लेण ।।७७५७।। नियरूवगव्वियाणं अहवा सुर-असुर-जक्खविलयाण । विहडावंती गव्वं एसा परियडइ भुयणंमि' ॥७७५८।। इय चंदसिरीवररूवदंसणुप्पन्नविम्हयरसाण । एमाइया वियप्पा संजाया जक्खविलयाण ||७७५९।।
Jain Education International
For Private & Personal Use Only
www.jainelibrary.org
