________________
सिरिभुयणसुंदरीकहा ॥
६७९ अइगरुयजायणासयसमहियसंजायदुक्खपब्भारो । सुहडो वि सुधीरो वि हु अर्कदइ दुहभरक्वंतो ।।७४४०।। जाण निमित्तं पुट्विं पावाइं कयाइं निद्धबंधूण । ते च्चेय उवालंभइ अवहिविन्नायपुव्वभवो ॥७४४१।। 'हा पुत्त! पुत्त! दुक्खियसत्तपरित्ताणकरणतल्लिच्छ! । किं किं उवेक्खसे वीरसेण! तडसंठियं(ओ) एण्हि ? ||७४४२।। सिंगारवइ! तडत्था संजाया संपयं गयसिणेहा । आवइवडियस्स ममं साहेज्जं किं न नो कुणसि ? ||७४४३।। एए वि मउडबद्धा सामंता विविहसुहडसंघट्टा । मं रक्खिउमसमत्था पेच्छ उवेक्खंति तीरत्था ।।७४४४।। एयं पि चाउरंगं आवइसमयंमि जइ न उवयरिही । इमिणा निरत्थएणं बलेण ता किं करिस्सामि ?' ।।७४४५।। एवं च विलवमाणस्स तस्स न य कोइ करइ परित्ताणं । न य कस्स वि सा सत्ती जो तं नरयाओ उद्धरइ ।।७४४६।। तिरियाइयासु आहिंडिऊण नाणाविहासु जोणीसु । कह कह वि तुडिवसेणं पावइ मणुयत्तणं जीवो ॥७४४७।। संपत्तमाणुसत्तो अदूरभविओ खओवसमजोगा । भवियव्वयावसेणं दरविहडियमोहघणपडलो ॥७४४८।। सो पुनपरिणईए अणेयभवसयसहस्सदुल्लंभो । अधरीकयकप्पदुमो अचिंतचिंतामणिसरिच्छो ।।७४४९।। हत्थालंबो व भवावडंमि विवडंतयाण जो होइ । मोहंधयारमहणो रवि व्व परमत्थओब्भासी ।।७४५०।।
Jain Education International
For Private & Personal Use Only
www.jainelibrary.org
