________________
सिरिभुयणसुंदरीकहा ॥ कोऊहलबुड्डेणं एसा विनडिज्जए पियंयमेण । आणंदिज्जइ तक्खणमप्पाणं दंसयंतेण ||७४०७।। रायंधेण नियच्छइ कमलं घेत्तूण केण वि नरेण ।
ओयारणयं कीरइ नियदइयावयणकमलस्स ।।७४०८॥ एसा हम्मइ दइएण देव! करकयमुणालदंडेण । निब्बुड्डिऊण अंतो वंचंती पिययमपहारं' ॥७४०९।। एत्थंतरंमि राया पल्लवयं भणइ ‘वच्च रे ! तुरियं । हक्कारसु मह पुत्तं परिसंतं विविहकीलाहिं' ॥७४१०॥ ‘एवं' ति पभणिऊणं रायाएसं तहेव सो कुणइ । वीरो वि तुरियतुरियं उत्तरइ सराओ संभंतो ||७४११।। उत्तरिऊण य कयविविहलडहसिंगारमणहरो वीरो । पाएसु पडइ रायस्स सयलखयरिंदपरियरिओ ।।७४१२।। तो भणइ सूरराया 'तुह सीयलजलकयं सरीरंमि । मा होउ पुत्त ! जडं आहूओ तेण कज्जेण' ||७४१३॥ एत्थंतरंमि राया परियण-नरनाह-खयरपरियरिओ । आरुहइ जयकरिंदं सूरो सह वीरसेणेण ||७४१४।। अइगरुयरिद्धिवित्थरआणंदियसयललोयरमणीयं । पविसइ चंपं राया सलहिज्जंतो पुरजणेहिं ।।७४१५।। इय सूरसेणराया विणीयनियपुत्तवड्डियाणंदो । तियसाहिवं पि मन्नइ दुत्थियमिव निययसोक्खेण ।।७४१६।। एवं अवरोप्परपरमपीइपरिवड्डमाणसोक्खाण । वच्चंति ताण दिवसा देवाण व देवलोयंमि ।।७४१७।।
Jain Education International
For Private & Personal Use Only
www.jainelibrary.org
