________________
६७०
सिरिभुयणसुंदरीकहा ॥ जयजयरवं व वियरइ सूरनरिंदप्पवेससमयंमि । अइबहलकोइलाकलयलेण संजायपरिओसं ॥७३४१॥ दक्खिणपवणपहल्लिरनवपल्लवपाणिक्खित्तकुसुमोहं । बहुदियसागयसिरिसूरसेणअग्धं व उक्खिवइ ।।७३४२।। एवं गुणाभिरामं घणकुसुमं नाम उववणं विसइ । राया पौरपरिग्गहपरियरिओ परमहरिसेण ||७३४३।। तो भणइ सूरराया पियपुत्तं वीरसेणनरनाहं । कीलह तुब्भे सव्वे अहमुज्जाणं निरिक्खिस्सं ॥७३४४।। ‘एवं' ति पभणिऊणं वीरो नीसेसमंडलवईहिं । नाणाविलासिणीहि य सहिओ अह कीलिउं लग्गो ||७३४५।। राया वि सूरसेणो सिंगारवईए परिगओ भमइ । अप्पसमाणनरेसरपरियरिओ मणहरुज्जाणे ।।७३४६।। अल्लवओ नामेणं वणवालो कहइ रायरायस्स । नाणाविहतरुनियरं विसेसडोहलयनामजुयं ।।७३४७।। 'देवदुलंघा विसया हरंति जं माणवा न तं चोज्जं । एगिदिया वि तरुणो तेहिं हरिज्जति तं चोज्जं ।।७३४८॥ इह केइ फरसणेणं रसणेण य के वि के वि घाणेणं । रूवेण के वि तरुणो फुल्लंति य के वि सद्देण ||७३४९।। सरहसपीणपओहरफंससमुप्पन्नतक्खणवियासं । एयं कुरुबयरुक्खं पेच्छसु घणकुसुमसंछन्नं ॥७३५०।। एसो वि असोयतरू तरुणीपयपहरफंसपरितुट्ठो । फुल्लइ पहल्लिरुवेल्लपल्लवो [तरुसु रमणीओ(?) ||७३५१।।
Jain Education International
For Private & Personal Use Only
www.jainelibrary.org
