________________
सिरिभुयणसुंदरीकहा ॥ वीरत्तणेण दक्खत्तणेण दंतेसु नसियपयजुयलो । कुंभत्थलमारूढो कुमरो तो अग्गभाएण ।।६१९।। जा उडइ करिनाहो सधीरपरिधुणियकंधरो तुरियं । ता उडि(ड्डि)ऊण दूरं पहओ कुंभम्मि कुमरेण ॥६२०।। अइनिठुरचरणपहारताडिओ विरसमारसंतो य । मुह-करविणितरुहिरो नीहरिओ तप्पएसाओ ॥६२१।। नाऊण समकिलंतं निप्फंदं गलियरोसदीणमुहं । वणहत्थि चइऊणं अन्नपहेणं गओ राया ॥६२२।। एत्थंतरम्मि सूरो अइउन्नयनहसिरम्मि आरूढो । तक्खेउब्भवतावाओ लोयदुसहो व्व संजाओ ॥६२३।। बहुभूमिधाविएणं कढोररविकिरणदुसहतावेण । तण्हापरिसुसियमुहो उदयं अनि(नि)सिउमाढत्तो ।।६२४॥ जा थोवंतरभूमि वच्चइ राया तिसासमक्तो । ता नाइदूरदेसे निसुणइ वीणाज्झणकारं ।।६२५॥ आणिं(ण)दियसवणिंदियसम(व)णंतरमणविइन्नसंतोसो । मणसंतोसासाइयसरीरसुहसंगयं गीयं ।।६२६।। सुणिऊण परमपहरिसवसपसरियपुलयकलियदेहस्स । हरिविकुमस्स जाओ मणम्मि एयारिसवियप्पो ॥६२७।। निम्माणुसे अरन्ने कत्तो एवंविहं महुरगेयं । ता होही एत्थ फुडं तहाविहं किंपि सुरभवणं ॥६२८॥ इय चिंतिऊण राया तुरियपयक्खेवलंघिअद्धाणो । जा जाइ थोवदूरं ता पेच्छइ विविहतरुसंडं ॥६२९।।
Jain Education International
For Private & Personal Use Only
www.jainelibrary.org
