________________
६३६
सिरिभुयणसुंदरीकहा ॥ भूवलयपरक्कमजुओ ववसाई गरुयनिग्गयपयावो । एगसीमो य नरवर! उवेक्षणीओ न सो होइ ।।६९७१।। ता देव! एत्थ एसो तुम्ह सुसज्झो न अन्नदेसंमि । इय भाविऊण चित्ते जं उचियं तं समायरह ।।६९७२।। एएण पुण अवस्सं तुम्हे उम्मूलिऊण अचिरेण । एगच्छत्ता धरणी भोत्तव्वा विक्कमड्डेण' ।।६९७३।। जंपइ महिंदपालो 'न एयमुचियं कुलप्पसूयाण । अन्नो वि वइरिओ नणु होइ अवज्झो घरे आओ ॥६९७४।। एसो पुण आहूओ दूअं संपेसिऊण जामाऊ । वीससिओ गुणगरुओ अदिट्ठवंकत्तणो सुयणो ।।६९७५ ।। ता नणु अदिट्ठदोसो अप्पयडियदुट्ठमणवियारंमि । कह कीरइ अवयारो इमंमि रे मंतिणो ! एण्हि ?' ।।६९७६।। तो भणइ सुमइनामो मंती 'नरनाह! सुणसु मह वयणं । रज्जं हि नाम विसमं दुप्परियण्णं कुबुद्धीण ।।६९७७॥ वेसाण जोव्वणं पिव अहिलसणीयं न कस्स किर रज्जं । बहुसप्पमंदिरं पिव सभयावासं भवे एयं ।।६९७८।। सकलत्तं पिव एवं अइविविहपयत्तरक्खणीयं च । होइ अविस्ससणीयं वेरीयणसंगयं च इमं ।।६९७९।। वस्सिदिएहिं एयं भुंजेयव्वं सओवउत्तेहिं । मारइ अप्पाणं चिय रज्जं अजिन्नं व विवरीयं ।।६९८०।। इह अप्प-परविभागो जईण राईण होइ न कयाइ । कज्जावेक्खाए जओ अप्प-परत्तं नरिंदाण ।।६९८१।।
Jain Education International
For Private & Personal Use Only
www.jainelibrary.org
