________________
६१०
सिरिभुयणसुंदरीकहा ॥ तो अनदिणे एगंतवासभवणट्टिएण राएण । जणणिसमेया धूया वाहरिया अत्तणो पासे ।।६६८५।। भणिया बहुप्पयारं 'आचिक्खसु पुत्ति ! अम्ह नियचित्तं । कह तावंतनरिंदाण को वि तुह वल्लहो न हुओ ?' ||६६८६।। तो जणणि-जणयबहुविहपत्थणवयणोवरुद्धचित्ताए । जयसुंदरीए भावो जणणिमुहेणं तओ कहिओ ।।६६८७।। 'सो चेव मज्झ भत्ता रंको रोडो व्व होउ जो सो वि । जो अहिलसइ न अन्नं जुयई चित्ते वि जइ लिहियं ॥६६८८।। ते सव्वे वि सयंवरनरनाहा एत्थ आगया जे उ । विविहंतेउरकलिया बहुविहनारीपसत्ता य' ।।६६९९।। तो नरवइणा भणियं 'जइ एवं ता न कोइ इह भुयणे । होही हुओ व्व जो किर एकग्गमणो नियकलत्ते ॥६६९०।। एवंविहगुणजुत्तो गुणराओ चेव पुत्ति ! संभवइ । तस्स तुमं दायव्वा सुनिच्छियं एगचित्तस्स' ||६६९१।। तो रोसवसविसंठुलवयणपरिक्खलणगग्गयगिरेण । 'जा जाहि' त्ति सरोसं राएण विसज्जिया धूया ॥६६९२ ।। तो नरवइणा तुरियं गुणराओ सदिओ सकोवेण । ‘रे गुणराय ! पडिच्छसु परिणयणत्थं सुयं मज्झ ।।६६९३।। जइ किं पि भणसि अन्नं ता सविओ मह सरीरसवहेण । तुह चेव पुन्नपरिणइ पणामिया आगया एसा' ।।६६९४।। तो तं रायाएसं सरीरसवहं च तं अलंघतो । मोणव्वयं विहेउं उट्टइ नरनाहपासाओ !।६६९५।।
Jain Education International
For Private & Personal Use Only
www.jainelibrary.org
