________________
५८१
सिरिभुयणसुंदरीकहा ॥
पंचंगुलिघणसाहं नहकुसुमं किरणरयणओऊलं । पयकप्पतरुच्छायं आ(अ)ल्लीणा तुह न सीयंति ॥६३६७॥ अन्ने साहिति महिं चउरंगाडंबरेहिं सेन्नेहिं । एक्कंगेण वि तुमए तहा कयं जह न केणावि' ॥६३६८॥ इय एवमाइ विविहं आणंदुव्बूढहिययउक्करिसो । जंपतो पडिभणिओ वीरेण विचित्तजसराया ॥६३६९॥ 'सिज्झइ न सिज्झइ च्चिय एवं पुन्नाण देव ! आयत्तं । नियजोगयाणुरूवं उज्जमियव्वं तु पुरिसेण' ॥६३७०॥ इय एवमाइ बहुविहगोट्ठीसंतुट्ठमाणसा जाव । चिट्ठति ताव भणियं असोयराएण वयणमिणं ॥६३७१।। 'वीरस्स राय ! रज्जाहिसेयकज्जेण आगया अम्हे । ता सो निव्वत्तिज्जइ पसत्थतिहि-वार-लग्गमि ॥६३७२॥ एएणं चिय कज्जेण राय ! तुब्भे वि एत्थ आहूया । तह बंधुयत्तमित्तो चंदसिरी परियणसमेया' ॥६३७३।। तो भणइ विचित्तजसो ‘उचियमिणं खेयरिंद ! तुह वयणं । वत्थुमि वत्थुघडणा न कस्स किर रंजए हिययं ? ॥६३७४।। अच्चुन्नयमहिहरमंडलाई चइऊण पयइविणयंमि । रयणायरे व्व वीरे सिरि(री)ओ सरियाओ उववेंतु ॥६३७५।। एयस्स पुन्नपरिणइपणामियासेसभुयणरज्जस्स । नियचित्तसुद्धिपयडणमेत्तो च्चिय तुम्ह वावारो ॥६३७६।। ता उज्जमह तुरंता जं जह समओचियं हवइ कज्जं । तं तह कारेह सयं असोय-सेहरयरायाणो !' ॥६३७७।।
Jain Education International
For Private & Personal Use Only
www.jainelibrary.org
