________________
५८०
सिरिभुयणसुंदरीकहा ॥ इय निज्जियसयलतिलोयगरुयमाहप्पपयरिसो वीरो । वडंतो नरवइणा दिट्ठो परमप्पयमईए ॥६३५६।। तो पडिहारसमुब्भडहक्कासासंकभूमिवालेहिं । दिन्नपिहुगमणमग्गो ओइन्नो वीरदिट्ठीए ॥६३५७।। दठूण विचित्तजसं वीरो हरिसुल्लसंतरोमंचो । सीहासणाओ उट्ठइ संखुहियत्थाणवित्थारो ॥६३५८।। सहसंचलंतमहिवइचाडुसमुच्चरियजयजयव(ध?)मालो । पियरं व महारायं पणमइ सह सव्वराएहिं ।।६३५९॥ तो नरवई दिसागयकरसरिसपसारिओभयभुएहिं । आलिंगिऊण वीरं पुण चुंबइ उत्तिमंगंमि ॥६३६०।। ता तत्थ चेव पेच्छइ वीरो वरमित्तबंधुयत्तं पि । आलिंगइ सप्पणयं सो वि सविणयं च पणमेइ ।।६३६१ ।। ता पुट्विं परिकप्पियसिंहासणसंठिए महाराए । उवविसइ वीरसेणो सकीयसीहासणे पच्छा ।।६३६२ ।। पुच्छियकुसलोदंता परोप्परं जायसमुचियालावा । अच्छंति खणं पच्छा विचित्तजसराइणा भणियं ॥६३६३॥ 'सकयत्थोऽहं दिलोसि जेण रयणायरो व्व इह जंमि । संभंततिलोयाओ विसंति रिउकित्तिगंगाओ ॥६३६४।। तुह वसइ वीर ! केऊररयणमणिसघणकिरिणसरियंमि । भुयपंजरंमि लच्छी जहासुहं रायहंसि व्व ॥६३६५।। जे वीर ! अमच्छरिणो तुह गुणनिवहं वहति हिययंमि । चिंतामणि व्व ताणं चिंतियफलदायगो होसि ॥६३६६।।
Jain Education International
For Private & Personal Use Only
www.jainelibrary.org
