________________
सिरिभुयणसुंदरीकहा ॥ ता सो पसत्थदियहे बहुसेन्नभरेण भरियमही(हि)वीढो । पिउ-माइकयपणामो लद्धासीसो समुच्चलिओ ॥५३१।। बलभारसमक्वंता चलतुरयखुरग्गतिक्खघायहया । धाहाविउव्व धरणी वच्चइ सग्गं रयमिसेण ॥५३२।। बहुयत्तणेण सेन्नं संच्छन्नासेसमहियलपएसं । भुयणं पिव संचलियं कुमारसेवाणुराएण ।।५३३।। सूरो वि अंतरिज्जइ सेन्नसमुत्थाए जस्स धूलीए । सेन्नं तु पुण न जाणे किं काही तस्स चउरंगं ॥५३४।। चलियम्मि जम्मि पढमं तुरयखुरुक्खणियधरणिरयपडलं । पसरइ दिसासु पच्छा अकंतमहीयलं सेन्नं ।।५३५।। चलिओत्ति जम्मि निसुए अण(णु)हूयभयाण वेरिविलयाण । पवसंति तक्खण च्चिय विलाससिंगारवावारा ।।५३६।। एवं च सो नरिंदो अणवरयपयाणएहिं मलयगिरि । पत्तो मिलंतरिवुबल-संगलियसमग्गलबलोहो ॥५३७।। तत्थेक्कसमपएसे सुलहिंधण-तण-जलाइउवहारे । आवासिओ ससेन्नो आसं(स)न्नसमुद्दतीरम्मि ॥५३८॥ जत्थुच्चतालतरुसंडमंडली सहइ पवणकयकंपा । बहुबलनिवेसदसण-विम्हयरसधुणियसीसव्व ।।५३९।। सिरधरियमहाफललुंबिभारदरनमियनालिएरीओ । बहुदियसागयनरवइ-विणयं व नियं पयासेंति ।।५४०।। दढनागवल्लिपरिरंभ-निब्भरा कमुयतरुवणालीओ । हरिविकूमदंसणजायहरिसपसरं व दावंति ।।५४१।।
Jain Education International
For Private & Personal Use Only
www.jainelibrary.org
