________________
५६३
सिरिभुयणसुंदरीकहा ॥
इय एवमाइ विविहं भणिउं रोमंचकंचुइज्जंतो(ता) । पुणरवि कयप्पसाया नियनियठाणं गया लोया ॥६१६९।। एत्थंतरंमि पविसइ पलंबसियचोडएण छन्नंगो । अच्चुज्जलपट्टसुयसिरवेढुव्वेढणक्खणिओ ।।६१७०॥ वसुहानिहित्तजाणू पणामपुव्वं असंभमुभंतो । करवत्थंचलझंपियमुहकमलो मूलपडिहारो ॥६१७१॥ विन्नवइ पगब्भगिरो ‘देव ! दुवारंमि तुज्झ पडिक्ख(ख)लिया । अट्ठ व्व दिसावइणो चिटुंति सहस्सपरिगुणिया ॥६१७२।। सव्वे वि मउडबद्धा अट्ठदिसाभायसंठिया देव ! । अवरोप्परपरक्कममसहंता गंधकरिणो व्व ॥६१७३।। तुह चंडप्पयावानलसंतत्ता नाह ! भूमिवलयंमि । वीसाममलहमाणा तुम व्व कप्पदुमं ल्ली(ली)णा ॥६१७४॥ जाणं पयाणसमये बलभरसम्मद्दपीडिया पुहई । धाहाविउं व वच्चइ रयच्छला इंदलोयंमि ॥६१७५।। जाणमणंतनराहिव-सियछत्तच्छाइयाइं सेन्नाई । दीसंति व सेवाआगयाइं बहुसेयदीवाइं ॥६१७६।। चलधयधवलच्छिजुया करिंदकुंभत्थलोरुथणवठ्ठा । वेस व्व जाण सेणा निरत्थयं कुणइ भूमिवई ।।६१७७।। ते अट्ठसहस्ससंखा असंखसेणाभरेण संजुत्ता । सेवाहिलासिणो तुह दसणसोक्खं अहिलसंति' ॥६१७८॥ तो भणइ वीरसेणो ‘तुरियं पडिहार ! ते पवेसेसु' । 'आएसो' त्ति भणित्ता दुवारदेसं गओ दंडी ॥६१७९।।
Jain Education International
For Private & Personal Use Only
www.jainelibrary.org
