________________
सिरिभुयणसुंदरीकहा ॥ भण्णइ विणओ एण्हि दंसण-नाणे य तह य पच्छित्ते । अरहंते य पवयणे थेर-गिलाणे तवस्सीसु ॥६०७०।। बाले गुणगरुएसु एमाइसु साहुणा पयत्तेण । विणओ खलु कायव्वो विणओ खु महातवो जेण ।।६०७१।। विणयफलं सुस्सूसा गुरुसुस्सूसाफलं सुयन्नाणं । नाणस्स फलं विरई विरइफलं आसवनिरोहो ॥६०७२।। संवरफलं च सुतवो तवस्स पुण निज्जरा फलं तीए । होइ फलं कम्मखओ तस्स फलं केवलं नाणं ॥६०७३।। केवलनाणस्स फलं अव्वाबाहो निरामओ मोक्खो । तम्हा कम्मखयाणं सव्वेसिं भायणं विणओ ।।६०७४।। विणयंजणे(णं) पणासइ अट्ठमयट्ठाणतिमिरपडलाइं । पेच्छइ तओ असेसं जयं पि जहवट्ठियं साहू ॥६०७५।। वेयावच्चं भन्नइ तइयं अभितरं तवं राय । अनिगूहियबल-विरिया करंति जं साहवो हिट्ठा ॥६०७६।। अब्भागयाण निच्चं गुरूण बालाण तह गिलाणाण । एमाइयाण सावय ! वेयावच्चं करेयव्वं ॥६०७७।। अंगस्स मद्दणाइं नाणावीसामणाओ साहूण । अन्न-भेसज्जमाई दायव्वं जं जहाजोगं ॥६०७८।। एण्हि सुण सज्झायं तवं चउत्थं नरिंद ! अइगरुयं । तं होइ पंचभेयं आयन्नसु सावहाणमणो ॥६०७९॥ सज्झायतवो भण्णइ सो च्चिय सुयवायणाण(ए) पुच्छाए । तच्चितण-गुणणेण वक्खाणकमेण नायव्वो ॥६०८०।।
Jain Education International
For Private & Personal Use Only
www.jainelibrary.org
