________________
सिरिभुयणसुंदरीकहा ॥ इय सोउं नरनाहो धम्मं सम्मत्तसोहियं ससुओ । गिण्हइ गुरूसगासे सम्मं रंकोव्व रयणनिहिं ॥४६६।। ते वंदिऊण सूरिं पविसंति पुरीए दोवि पिउ-पुत्ता । सेवंता जिणधम्मं चिट्ठति जहासुहं तत्थ ॥४६७।। अह अन्नदिणे राया अत्थाणत्थो महोयहिसमेओ । जावच्छइ हरिविकुम-कुमारउच्छंगकयचलणो ||४६८।। ताव पणामाणंतर-सिरनिबिडघडंतसंपुडकरग्गो । विन्नवइ महारायं पडिहारो सविणयं एयं ॥४६९।। इह देव ! वैरिसीहेण पेसिओ दूरदंडयत्ताओ । दारम्मि लेहवाहो चिट्ठइ, को तत्थ आएसो ? ॥४७०।। तो भूसन्नाणुमउ(ओ) पडिहारपवेसिउ पवणनामो । दिट्ठो नराहिवइणा तक्खणमेत्तागओ तुरिओ ।।४७१।। पहखेयखिन्नदेहो आजाणुवलग्गधूलिधूसरिओ । समसेयबिंदुवहभालकलियरविकिरि(र)णसंतावो ॥४७२॥ अणवरयगमणसीउण्हवायपरिसुसियमंस-रुहिरतणू । चलणग्गमहावत्तो वाउविमाणे व्व आरूढो ॥४७३।। वामंगखंधलंबिरपोत्तयपक्खित्तदक्खिणकरग्गो । लेहक्खेव-पणामे किमेत्थ पढमं ति चिंतंतो ।।४७४।। पवणो पणमइ देवत्ति दंडिभणिएसु सावहाणेसु । पक्खित्ता नरवइणा लेहे पुण तम्मि नियदिट्ठी ॥४७५॥ तो तन्निउत्तपुरिसेण सिढिलिए तम्मि भुज्जलेहम्मि । अणुमन्निएण य तओ पवाइयं तत्थिमं कज्जं ॥४७६॥
Jain Education International
For Private & Personal Use Only
www.jainelibrary.org
