________________
५१८
सिरिभुयणसुंदरीकहा ॥
सो को वि न भूवलए जाओ जणणीए तारिसी पुत्तो । जो मज्झ रणझडप्पं अक्खुद्धो सहइ दुव्विसहं' ||५६७५ ॥ तो अप्पपसंसावयणसवणसंजायसिढिलहियएन । लीलावहासगब्भं सो भणिओ वीरसेणेण ॥५६७६ ॥ 'नरसीह ! तुज्झ विसए सव्वं संभवइ जं असंभवियं । किं तु न छज्जंति जणे किरियाहीणा मुहुल्लावा' ||५६७७ ।। 'किं तु न छज्जंति जणे'त्ति निसुयमेत्तेण वीरवयणेण । उत्तेजिओ नरिंदो विज्जुक्खित्तेण उप्पइओ ।। ५६७८ ।। तो निकारिमनरसीहविक्कमुक्करिसरंजिओ वीरो । परियप्पइ नियचित्ते रणरसरोमंचियसरीरो ।। ५६७९ ।। 'इह होंति विचित्ताओ पयईओ जयंमि वीरपुरिसाण । एक्के कज्जपहाणा बहुवयणा तदुभया अन्ने ॥५६८०।। ता एसो नरसीहो वयणपहाणो य कज्जसारो य । ता एएण सहाऽहं खत्तायारेण जुज्झिस्सं' ॥ ५६८१ ॥ एवं धरिऊण मणे वीरो ओयरइ वरविमाणाओ । तं पि नियखग्गरयणं ठवइ विमाणेकदेसंमि || ५६८२ ।। तो सो उप्पयमाणो अहो पडतेण वीरनाहेण । वच्छत्थलंमि पहओ नियएण वियडयरवच्छेण ||५६८३ ॥ तो अन्नोन्नोरत्थलसंघट्टुच्छलियपडिरवरउद्दं ।
वित (त्त ) त्थसयललोयं सहसा फुडियं व बंभंड || ५६८४ ॥ अह कुमरमहोरत्थलपहारवियणापरव्वसो पडिओ । मुच्छानिमीलियच्छो 'धस' त्ति धरणीयले राया ॥ ५६८५ ।।
Jain Education International
For Private & Personal Use Only
www.jainelibrary.org
