________________
४९२
सिरिभुयणसुंदरीकहा ॥ तो भणइ जयवडाया ‘एवं काहामि जं तुम भणसि । पहुणो हिएक्कनिरया अवस्समणुजीविणो होति ।।५३८९।। तो भणिया सा वि मए ‘जाह तुमे पुण खणंतरेणेव । कुमरो वि आगमिस्सइ' इय भणिए निग्गया बाला ॥५३९०॥ कुमरो वि खणद्धेणं जिणिंदपयपंकयं पणमिऊण । सद्धिं मए तुरंतो उप्पइओ गयणमग्गंमि ||५३९१।। तो देव ! मए विरइय-अदिट्ठविज्जापहावओ वीरो । लोएहिं अदीसंतो संपत्तो तीए गेहमि ।।५३९२।। कयमंगलोवयारो पविसइ एगंतवासभवणंमि । देवो व्व देवलोए चिट्ठइ सह जयवडायाए ॥५३९३।। एत्तो य सयलबलभर-भरंतधरणीयलो य नरसीहो । नीहरइ सनगरीओ नहमि खयरीओ(उ) पेच्छंतो ॥५३९४।। नेमित्तिएण सहिओ रोसारुणनयणजुयलदुप्पेच्छो । संपत्तो जिणभवणं परिवेढइ तं पि सेन्नेहिं ।।५३९५।। तो निउणयरनिरिक्खिय कुमारमंतो बहिं च अनियंतो । पुण पुच्छइ जोइसियं 'कहमेवं विनडिया तुमए ?' ||५३९६।। नेमित्तिएण भणियं जंमि मुहुत्तंमि पुच्छियं तुमए । तंमि इह च्चिय हुतो नरिंद ! न हु एत्थ संदेहो' ||५३९७॥ तो जंपइ नरनाहो ‘किं बहुणा बंभणित्थ भणिएण ? । संदेहतुलारूढं रक्खेज्ज ममाओ(उ) अप्पाणं' ॥५३९८।। अह ताओ रक्खसीओ अट्ठ वि गयणाओ ओयरंतीओ । दिट्ठाओ नरिंदेणं भयविहडियबलसमूहेण ॥५३९९।।
Jain Education International
For Private & Personal Use Only
www.jainelibrary.org
