________________
४९०
सिरिभुयणसुंदरीकहा ॥ सा देव ! तक्खणे च्चिय मिलाणसव्वंगसुंदरावयवा । दुल्लहजणाणुरत्ता पत्ता जणसोयणीयत्तं ।।५३६७।। तो देव ! समुच्छलिओ करताडणतुट्टहारवच्छयलो । उप्पाइयकरुणरसो अक्कंदो सयलनारीण ॥५३६८।। एयं तुज्झ सरूवं फुडवियडत्थं मए समक्खायं । जं एत्थ होइ उचियं तं देवो कुणसु सयमेव' ||५३६९।। तो भणइ वीरसेणो ‘सच्चमिणं उचियमेव कायव्वं । पन्नंगणाय(इ) संगो, गरुयाणं अणुचिओ होइ ॥५३७०।। अणुरत्ताउ वि सुंदर ! गुणगंधविवज्जियाओ वेसाओ । जा सुयणमालियाओ व न होंति परिभोगजोगाओ ॥५३७१।। एयाओ गुणड्ढाओ वि भुयंगसंगोवियाओ भीमाओ । सज्जणविवज्जियाओ दूरं चंदणलयाओ व्व ।।५३७२ ।। वग्घीसु व वेसासु पयईए भयावहासु को नेहो ? । कूरत्तणेण जाणं दंसणमवि हणइ विस्सासं ॥५३७३।। देहसरूवेणं चिय सरलाओ गईए होति कुडिलाओ । परभक्खणनिरयाओ वेसाओ भुयंगियाओ व्व ॥५३७४।। एयाहि सह पसंगो सुंदर ! सुकुलुग्गयाण पुरिसाण । लज्जावहो खु पढमं पुण मइलइ निम्मलगुणोहं ।।५३७५।। ताव च्चिय गरुयत्तं ताव च्चिय फुरइ निम्मला कित्ती । ताव च्चिय सुगुणित्तं जाव न वेसाहि सह संगो' ॥५३७६।। तो पुण मए वि भणियं ‘अवितहमेयं न अन्नहा देव ! । पुव्वुत्तसरूवाओ वेसाओ होति नियमेण ॥५३७७॥
Jain Education International
For Private & Personal Use Only
www.jainelibrary.org
