________________
४८९
सिरिभुयणसुंदरीकहा ॥
तो जामि अहं तुरियं तत्थ खणं अच्छिऊण विणियत्तो । तव्वइयरमुणियत्थो कहेमि सव्वं कुमारस्स ॥५३५६।। ‘सा देव ! जयवडाया पयाहिणावसरमुणियमणभावा । तुह पढमं चिय कहिया तए वि 'वेस'त्ति परिभूया ।।५३५७।। तो देव ! संपयं सा सहीहिं अब्भत्थिया बहुपयारं । इच्छइ न गेहगमणं तुज्झ विओयं अणिच्छंती ।।५३५८।। तो सा सरोसनिठुरसहिवयणायन्नणेण अहिअयरं । तुज्झ अलाभुद्दीवियसंतावं वहइ अंगम्मि ॥५३५९।। पुण सा सहीहिं भणिया 'जाउ क्खयं तुज्झ एरिसविवेओ । गांधारि ब्व अकज्जे अप्पाणं जं विडंबेसि ॥५३६०।। नियजीयसंसए वि हु न होइ तुम्हारिसीण नारीण । एवंविहं सरूवं जणंमि उवहाससंजणयं ।।५३६१।। को मच्छरो गुणेसुं ? सोहग्गनिहि क्खु सो महापुरिसो । भग्गो जेण अभग्गो सोहग्गमडप्फरो तुज्झ ।।५३६२।। अइसुहएण वि गुणवंतएण किं तेण सहि ! सुरूवेण ? । जो मुणियतुहसरूवो करुणामेत्तं पि नो कुणइ ? ।।५३६३।। साहीणे च्चिय रज्जसु न पराहीणंमि सुठु वि गुणड्डे । नणु चक्कवट्टियरिणीराओ रंकस्स दुहहेऊ ।।५३६४।। तो सो अन्नासत्तो तस्स पुरो चयसि जइ वि नियपाणे । तो वि तुह उत्तरं सो वरिससहस्सेहिं वि न दाही' ।।५३६५।। तो देव ! इमं वयणं सहीण सोऊण निहयपच्चासा । तलछिन्नवणलया इव मुच्छाए महीयले पडिया ॥५३६६।।
Jain Education International
For Private & Personal Use Only
www.jainelibrary.org
