________________
सिरिभुयणसुंदरीकहा ॥
४८३ किं ते अपडुसरीरं ? किं वा कज्जंतरेण केणावि । अवहरियं ते चित्तं? अन्नं वा किं पि? तं कहसु' ॥५२९०॥ निउणसहीयणविनायवीरसेणाणुरायमेसा वि । मुणिऊण कज्जकुसला जहत्थपडिउत्तरं देइ ॥५२९१।। 'सहि ! पंडियाण पुरओ जो जंपइ जडमई अपरमत्थं । सो कुणइ सिणेहखयं पत्थुयकज्जं च नासेइ ।।५२९२।। ता सुटठु लक्खिओ मह सहीओ ! तुम्हेहिं माणसवियारो । जइ सच्चं निउणाओ ता जाणह साहणोवायं ॥५२९३।। जइ मज्झ न संपज्जइ तुब्भेहिं वि एस निउणबुद्धीहिं । ताऽकिंचिकरत्तेणं तुम्हं सलिलंजलिं दाउं(दाहं?) ||५२९४॥ तुब्भे वि मह पमाणं एवंविहकज्जसाहणोवाए । जइ कइया वि सहीओ मए निउत्ताओ ता कहह ।।५२९५।। को को न सहीउ मए दोसो काऊण वाहिओ पुरिसो । दासित्तणं पि मन्ने एयंमि पुणो मह दुर्लभं' ।।५२९६॥ तो सा सहीहिं(हि) भणिया ‘मा झूरसु करिसिओ तुह गुणेहिं । सयमेव वसे होही एस जुवा नत्थि संदेहो ।।५२९७।। दिढे तुज्झ सरूवे केत्तियमेत्तं व रागिणो पुरिसा ? । वस्सिदिया वि मुणिणो गयरागा ते वि खुब्भंति ॥५२९८।। तुह चेव रूव-जोव्वण-सोहग्ग-विलास-हासमाईया । दूया हवंति सुंदरि ! अवयासो कत्थ अम्हाण ? ||५२९९।। जो होइ अप्पणा किर हीणगुणो तस्स पाडुयवसेण । संपडइ कज्जसिद्धी न उणो तुम्हारिसजणस्स' ॥५३००॥
Jain Education International
For Private & Personal Use Only
www.jainelibrary.org
