________________
सिरिभुयणसुंदरीकहा ॥
सो तुम्हाणं सुंदरि ! महासईणं पहावरज्जूए । मीणो व्व गलेण इहं वहाय आकरिसिओ याओ ||५२४७।। आओ त्ति निसुयमेत्ते फुरंतकोवारुणच्छिवत्ताहिं । निद्दयडसिउट्ठउडं 'हुं हुं' ति पयंपियं ताहिं ॥५२४८।। तो तक्खणेण अट्ठ वि विज्जाबलविहियघोररूवाओ । दिट्ठाओ नरिंदेण वि महाभउब्भंतनयणेण ॥५२४९।। 'हा रक्ख रक्ख सामिय ! किमेयमच्चब्भुयं तयं जायं । इय जंपिरीए राया परिरद्धो कणयरेहाए ।।५२५०।। आपिंगवट्टलोयणकरालदाढुद्धकविलकेसाओ । निच्छोल्लियमंससरीरमुक्कचम्मट्टिमेत्ताओ ।।५२५१।। मणसंभवंतरक्खसिभावेण व जाण भखि(क्खि)यमसेसं । लावन्न-रूव-जोव्वणमंतो-व्वस-मंस-महिराई ॥५२५२।। तो ताहिं तक्खण च्चिय भणिओ राया ‘किमज्ज वि विलंबो?। जावज्ज वि न करेमो नीसेसजयस्स खयकालं ॥५२५३।। तो तंमि चेव निवडउ समकालं रोसजलणजालोली । जम्हा विहत्तदेहो वसइ जमो अट्ठसु इमासु' ॥५२५४।। तो भणइ कणयरेहा 'न याणिमो देव ! कज्जपरिणामं । भमइ व्व मज्झ हिययं कुलालचक्के व आरूढं' ।।५२५५।। 'मा बीह पिए ! संपइ सिद्धं कज्जं न एत्थ संदेहो । जं सो वि एत्थ पत्तो एयाओ वि एत्थ पत्ताओ' ॥५२५६।। एमाइ कणयरेहं धीरविऊणं विणिग्गओ राया । ताहि समं पुरिलोयं भयतरलच्छं निरिक्खंतो ॥५२५७।।
Jain Education International
For Private & Personal Use Only
www.jainelibrary.org
