________________
सिरिभुयणसुंदरीकहा ॥
सो तस्स दंसणेणं उवसंतमणो तहा [अ]हं जाओ । जह मज्झ तक्खणे च्चिय उल्लसिओ धम्मववसाओ ||४९८३।। जं आगमंमि सुव्वइ पयडफलं साहुदंसणं होइ । तं तइया मह सावय ! पच्चक्खं चेव संजायं ।।४९८४।। एएण कारणेणं अणवरयं साहुदंसणं गुणिणो(णा)। कायव्वमेव जम्हा सफलो च्चिय साहुसंजोगो ॥४९८५।। जे निहयपावपसरा धम्मसम्म(म)द्धासिउत्तमसरीरा । ते दंसणेण मुणिणो हणंति पावं किमच्छरियं ? ||४९८६।। अम्हारिसा वि अविरइ-पमायवसवत्तिणो वि कूरप्पा । जं लद्धसाहुसंगा खवंति पावं निरवसेसं ॥४९८७।। उल्लसइ सुहो भावो पयलं वच्चंति अट्ट-रोद्दाइं । भवनिव्वेओ जायइ विसिट्ठमुणिदंसणगुणेण ॥४९८८।। जइ पुण अनन्नचित्तो विसुद्धपरिणामसंजुओ असढो । ताण सयासे निसुणइ जिणवयणं किन्न ता सिद्धं ? ||४९८९।। तो सावय ! अन्नोन्नं आणंदपवाह-पुलयमंगेसु । दतॄण परमहिट्ठा संपत्ता सूरिपासंमि ॥४९९०॥ तो परमभत्तिनिब्भरगलंतनयणंसुसित्तगत्तेहिं । पंचंगपणामेणं पणिवइओ दोहि वि मुणिंदो ।।४९९१।। तेण वि अणेयभवसयवणगहणदवानलो व्व मुणिवइणा । मोत्तूण झाणजोग्गं दिन्नो णे धम्मलाभो य ॥४९९२।। तो तस्स चरणफंसणपवित्तवसुहायलंमि उवविठ्ठा । अणुवमसरीरसोहं निरिक्खिमो जाव तस्सेव ।।४९९३।।
Jain Education International
For Private & Personal Use Only
www.jainelibrary.org
