________________
४२८
सिरिभुयणसुंदरीकहा ॥ तो नउलो सप्पो वि य दो वि समं जायपरमपरिओसा । अन्नोन्नसमालिंगणसुहमउलियलोयणा जाया ।।४६८६।। जाव न ते अन्नोन्नं जुज्झंति पसन्नमाणसा दो वि । ता मुसलपहारेणं हया मए पावकम्मेण ॥४६८७।। तो 'वारंतीए मए निहया ते' इय पयट्टरोसाए । सव्वो गिहवावारो परिचत्तो विमलमइए वि ।।४६८८॥ गंतूण वासभवणं रोसारुणलोयणा फुरंतोट्ठी । सेज्जाए सुहनिसन्ना जा अच्छइ ता अहं पत्तो ।।४६८९।। सप्पणयं साणुणयं समहुरमुवसामिया मए दइया ।। सा भणइ 'तुज्झ पिययम ! हिओवएसो मए दिन्नो ॥४६९०।। जो जह बंधइ कम्मं सो तहरूवं फलं पि पावेइ । अन्नेण विसे भुत्ते न हु अन्नो मरइ कइया वि ।।४६९१।। जं तुह रोयइ तं कुणसु नाह ! परमेत्तियं वियाणेमि । वच्चिह(हि)सि फुडं नरए घोरे कंदुज्जयपहेण' ॥४६९२।। इय एवमाइ बहुयं जपंती तत्थ वासभवणंमि । तद्दियसमेव ण्हाया उवभुत्ता तक्खण च्चेय ।।४६९३।। तो तव्वेलुवभुत्ताए तीए कुच्छीए सप्प-नउला ते । जमलगसुयभावेणं उववन्ना दो वि समकालं ॥४६९४।। सुण्हाकहियअहिंसाधम्मं हिययंमि सद्दहता ते । विहियाणसणफलेण सुमाणुसत्तंमि उववन्ना ॥४६९५।। धी ! संसारसहावो पुत्तो जेसि पि जणणि-जणयाण । सो च्चेय ताण जणओ जणणी सुण्हा य संभवइ ।।४६९६।।
:
Jain Education International
For Private & Personal Use Only
www.jainelibrary.org
