________________
४१७
सिरिभुयणसुंदरीकहा ॥ रे रे ! अमच्च ! तुरियं मह सेन्नं तुरय-करि-रहाई य । जं संगामसमत्थं संजत्तसु तं खणद्धेण ।।४५६५।। गंतूण वि जो पुरओ दइयं गेहं सुयं च संभरिही । सो एत्थेव विलंबउ जो सुहडो सो समं जाओ(उ) ॥४५६६।। वेगेण दक्षिणावह-विसए नासिकसंमुहं चलह । सविचित्तजसं समरे निहणिस्सं वीरसेणरिउं ॥४५६७॥ तो आएसाणंतर-मणंतजणहिययखोहणो सहसा । पत्थाणाहयभेरवभेरिरवो अह समुच्छलिओ ॥४५६८।। नीहरइ तुरय-रह-करि-पाइक्ककंतसयलपुरिमग्गं । सेन्नं सन्नाहुब्भडबहुसुभडसहस्ससंकिन्नं ॥४५६९।। मंडलिया रायाणो सामंता मंतिणो अमच्चा य । नरवइलद्धाएसा तुरियं नयरीओ नीणंति ॥४५७०॥ एत्थंतरंमि अहयं नरसीहनरिंदगमणपारंभं । नाऊण खणद्धेणं संपत्तो एत्थ नरनाह ! ॥४५७१।। आगंतूण य सव्वं जं जह दिटुं सुयं च तं सव्वं । एगते नीसेसं परिकहियं वीरसेणस्स ॥४५७२।। परिभाविऊण हियए भणिओ हं राइणा 'अरे ! सुणसु । मह कारणेण सव्वो आढत्तो विग्गहो तेण ॥४५७३।। एत्थागएण तेणं उवद्दवो होइ अम्ह देसस्स । परचक्कभउब्भंतो लोओ वि हु दुत्थिओ होइ ॥४५७४।। होइ महारायस्स वि गरुयाहिणिवेसदुत्थियं हिययं । सेणासामग्गीए धणक्खओ होइ अइगरुओ ।।४५७५॥
Jain Education International
For Private & Personal Use Only
www.jainelibrary.org
