________________
सिरिभुयणसुंदरीकहा ॥ तत्थ ठिओ खणमेत्तं वसुहाहिवसिरकिरीडकोणेहिं । सेवापणामसमए मसिणीकयपायवीढो हं ।।४५४३।। अत्थाणमंडवाओ तह संठियसयलजणसमूहाओ । घेत्तुं मंतिं हत्थे सेज्जाहरयं पविठ्ठो म्हि ॥४५४४।। तो एसा इह देवी एस तुमं मंतिमंडलपहाणो । मह कहह एत्थ काले किं जुत्तं होइ करणीयं ? ॥४५४५॥ ता जाव सो न सत्तू मह उवरिं एइ ता अहं तस्स । दप्पुद्धरस्स सीसे खग्गं भंजामि गंतूण ।।४५४६।। सो मह तहा न सत्तू होइ जहा निच्छियं विचित्तजसो । जो मह भिच्चो होउं एवंविहदुन्नए कुणइ ।।४५४७।। सत्तुंमि वि मित्तत्तं मित्ते सत्तुत्तणं च जो कुणइ । सो निच्छयएण(निच्छएण)नाओ पच्छन्नरिऊ निहंतव्यो ।।४५४८।। ता एस मज्झ मंतो संपइ तुब्भे वि भणह हिययगयं' । इय भणिए नरवइणा विमलव(म)ई भणिउमाढत्तो ।।४५४९।। 'तुह देव ! पयावानल-पलीवियाणंतमहिहरुग्घाया । दीसंति तणमसीहिं व सामलिया नियअकित्तीहिं ।।४५५०।। केसिं न नरिंद ! तए अहिमाणधणाण ठाविओ उवरिं । सत्तूण पणामावसरेसु सिरेसु नियचरणो ।।४५५१॥ तो देव ! तुह परक्कम-पयावसरिसो असेसभुयणे वि । जइ वि न सत्तू तह वि हु सुबुद्धिजुत्तेहिं होयव्वं ।।४५५२।। आवइसमुद्दपडिओ उत्तरइ नरो सुबुद्धिनावाए । बुद्धिविहीणस्स पुणो गोपयमवि सायरो होइ ।।४५५३।।
Jain Education International
For Private & Personal Use Only
www.jainelibrary.org
