________________
४०६
सिरिभुयणसुंदरीकहा ॥ इय चाटुचउरचारणगणेहिं पडिबोहिओ महावीरो । पणमियगुरु-देवपओ पलंकं मुयइ गयनिदो ||४४४४।। कयसयलगोसकिच्चो समन्निओ बंधुयत्तमाईहिं । वच्चइ नरिंदपासं पुणो वि नियमंदिरं एइ ।।४४४५।। एवं च ताण पइदिण-पवड्डमाणाणुरायरसियाण । विसयसुहासत्ताणं वच्चंति जहासुहं दियहा ।।४४४६।।
अन्नंमि दिणे राया पन्नायरमाइतुच्छपरिवारो । विजयवई(इ)सन्निहाणं वच्चइ उवविसइ य पहिट्ठो ।।४४४७।। जा जोयइ ता पेच्छइ चंदसिरिं तत्थ चेव संपत्तं । जणणिसयासे सविणयकयप्पणामं च पुच्छइ व्व ॥४४४८।। 'किं पुत्त ! तुज्झ भत्ता न दीसए ? अज्ज पंचमो दियहो । अपडुसरीरो अहवा कज्जंतरवावडो जाओ ?' ||४४४९।। भणियं चंदसिरीए ‘आरोग्गो ताय ! तुह पसाएण । किं तु न जाणे कत्थ वि गओ पिओ पंचमो दियहो' ।।४४५०।। तो भणइ महाराओ 'कहमेयं जं तुमं न जाणासि ?' । सा भणइ 'सच्चमेयं न ताय ! जाणामि तच्चरियं' ।।४४५१।। राया भणइ 'न इट्ठा तस्स तुमं तेण न कहइ तुहेसो । वल्लह-दइयाण जओ जीयपि परव्वसं होइ' ॥४४५२ ।। तो लज्जाए अहोमुहमवलोयइ कोड्डिमं करनहेहिं । विलिहंती चंदसिरी मोणेण ठिया खणं एवं ॥४४५३॥ तो भणइ महामंती 'न देव ! एवं जओ महापुरिसा । ' होंति न जुवईण वसे जिगीसिणो पुण विसेसेण ।।४४५४।।
Jain Education International
For Private & Personal Use Only
www.jainelibrary.org
