________________
सिरिभुयणसुंदरीकहा ॥
भीरुं व अक्क(क्ख)मं वा जुज्झाकुसलं व सत्तिहीणं वा । मं गणिऊण अवन्नाए तेण दूरं परिच्चयसि ? ।।३२४।। अपरिक्खियम्मि पुरिसे अदिट्ठरणविक्कमम्मि न हु जुत्ता । काउमवन्ना, तम्हा आगच्छसु मं परिक्खेसु ॥३२५।। इच्चाइ बहुपयारं कुमरो पुक्कारिऊण सव्वत्थ । तं चेव चंडियाभवण-मागओ चंडियं भणइ ।।३२६।। भयवइ ! अहमेत्थ पहे गच्छंतो मग्गिओ रणं जेण । सो निउणं पि गविट्ठो तहावि न मए इहं दिट्ठो ।।३२७।। ता सव्वहा वि तं मह दावसु मह जणयदिन्नदुव्वयणं । कह णु उवेक्खामि अहं एवं कयदुन्नयं वेरिं ॥३२८।। जइ तं न मज्झ दंससि ता तुरियं चंडि ! मह पडिच्छेसु । पवरुत्तमंगमेयं अहवा तं दंस सुहडं मे ॥३२९।। एत्थंतरम्मि राया विणिच्छियं तस्स तव्विहं सोउं । सुयमरणब्भउब्भंतो चिंताजलहिम्मि सो पडिओ ॥३३०॥ कह पेच्छ पाडिओ हं सुएण अइविसमसंकडे कज्जे । संदेहतुलाए ट्ठियं मह जीयं पुत्तजीयं च ॥३३१॥ गरुया रोसिज्जंता अप्पं व परं व संसए नेति । ता किं करेमि संपइ मए अणत्थो सयं विहिओ ॥३३२।। पज्जालिज्जइ अग्गी सुहेण अह सो उ पसरिओ दूरं । कहमिव ओल्हाविज्जइ गरुएहि वि बहुपयत्तेहिं ? ॥३३३।। जाणंतस्स वि कम्मा-णुभावसंजणियबुद्धिपसरस्स । संपडइ तमिह कज्जं तत्थ न पसरंति बुद्धीओ ॥३३४।।
Jain Education International
For Private & Personal Use Only
www.jainelibrary.org
