________________
३७०
सिरिभुयणसुंदरीकहा ॥ तो सहसा नरनाहो अनियंतो अन्नतंतिसामग्गि । निययसरीरावयवे दिष्टुिं पक्खिवइ हिट्ठमणो ।।४०४८।। तो कढिऊण छुरियं निययसरीराओ कड्डए प्रहारुं । आवलिऊणं बंधइ वीणादंडंमि वाएइ ।।४०४९।। सा वि तह च्चिय तुट्टा अन्नं ण्हारुं च जाव कड्ढेइ । ता वीणादंडो च्चिय सहसा दोखंडमावन्नो ।।४०५०।। तो भणइ नरवरिंदो ‘मा उच्चेवं करेसु खणमेत्तं । जा जणणि ! नियसरीरं वीणादंडं पगप्पेमि ।।४०५१।। तं चिय तंतिं काहं ताडिज्जंती वि जा न तुट्टेइ' । . इय जंपिऊण राया करेण छुरियं परिकलेइ ।।४०५२।। तो नियचरणंगुट्ठयमूला आरब्भ दीहपिहुचम्मं । उक(क)त्तिऊण बंधइ चलिऊणं निययसीसंमि ।।४०५३।। अगणियसरीरवियणो अचलियसत्तो सदेहकयवीणं । मुद्दियसरगामफुडं वायइ तह गायए हिट्ठो ॥४०५४॥ हिययभंतरपसरंतगीयस्सरवसचलंतकरजुयलो । तह गाइउं पयत्तो सासणदेवी जहाखित्ता ॥४०५५।। तो तस्म सत्त-पोरुस-गीयगुणायड्डियाए देवीए । पच्चक्खो च्चिय अप्पा पदंसिओ पुहइवालस्स ॥४०५६।। 'तुट्ठ म्हि पुत्त ! होही चंदसिरी-वीरसेणसंजोगो । तुह थोयदिणेहिं चिय निब्भंतो मज्झ वयणेण ॥४०५७।। जे च्चेय तस्स सत्तू असोय-सेहरयमाइणो खयरा । ते च्चिय भिच्चब्भावं तस्स कुमारस्स जाहिति ।।४०५८।।
Jain Education International
For Private & Personal Use Only
www.jainelibrary.org
