________________
३६०
सिरिभुयणसुंदरीकहा ॥ इय तस्स सयलसज्जणचूडामणिसन्निहस्स नरवइणो । न फुरंति खणं पि मणे परंमि अवयारबुद्धीओ ||३९३८।। तो तुह असोय ! हियए परिणयमिव जिणमयं ति मन्नामि । कह संभवंति इहरा पसमाणुगया सुहा भावा' ।।३९३९।। इय भणिऊणं विरए कुमरंमि तओ असोयराएण । पउणीकयं असेसं नियसेन्नं विविहविच्छडं(डु) ॥३९४०।। पुण सेहरेण वि तहा विज्जाबलकयविमाणनिवहेहिं । उच्छाइयं असेसं गयणयलमणेगरूवेहिं ।।३९४१।। अवहरिया जेण पुरा चंदसिरी मणिविमाणरयणेण । तं चेय कुमरपुरओ उवट्ठियं फुरयघणकिरणं ।।३९४२।। बहलिंदनीलसामलमऊहमासलियमज्झिमपएसं । चंदसिरिहरणजायं अंतोपावं व उव्वहइ ।।३९४३।। विदुमरयणनिवेसियमहल्लज्झुल्लंतमोत्तिउऊलं(?) । कयपच्छायावं पिव थूलंसुकणेहिं जं रुयइ ।।३९४४।। पेरंतेसु परिट्ठियरविमणिजालासहस्ससंवलियं । दुच्चरियसोहणत्थं कयप्पवेसं व्व जलणंमि ॥३९४५।। इय पारियायपल्लवकयतोरणमुब्भिउब्भडपडायं । आरुहइ सह पियाए विमाणरयणं महावीरो ॥३९४६।। उभयंसपाससंठियविज्जाहरसुंदरीकरथे(त्थे)हिं । वीइज्जंतो ससहरकरपंडुरचारुचमरेहिं ।।३९४७।। पज्जुन्न-बंधुयत्ता बंधुजीवा य कुमरजाणंमि । सिररइयकरयलंजलिबंधा पुरओ समारूढा ॥३९४८।।
Jain Education International
For Private & Personal Use Only.
www.jainelibrary.org
