________________
३५८
सिरिभुयणसुंदरीकहा ॥ 'इह देव ! तुह समुज्जलपुण्णपहावेण सुहयरं जायं । इण्हि पत्थुयकज्जे दिज्जउ नरनाह ! अवहाणं' ॥३९१६।। ‘एवं होउत्ति तओ कुमरो संपेसिऊण नियमित्तं ।
आणावइ चंदसिरिं पज्जुन्नं बंधुजीवं च ॥३९१७।। दछृणं चंदसिरी कुमरं खयरिंदसेन्नपरियरियं । कयकरसंपुडसेहर-असोयराएहिं कयसेवं ।।३९१८।। धगधगधगेंतदूसहसाहावियतेयपसरदुद्धरिसं । कंचणगिरिं व्व बहुविहधरणीहरकलियपायंतं ॥३९१९।। चिंतइ मणंमि ‘पेच्छह अच्चब्भुयपुन्नपयरिसफलाई । जं वैरिणो वि मित्ता संजाया अज्जउत्तस्स ॥३९२०।। जायइ विसमं पि समं गहिरं पि सथाहमेव धन्नाण । इयराण पुणो तं चिय पए पए होइ विवरीयं ।।३९२१।। एयंविहाण पायं कप्पतरूणं व परुवयारीण । जायंति साणुबंधा समंतओ पुन्नपारोहा' ||३९२२।। इय एवमाइ पिययमदंसणवसजायतग्गयवियप्पा । चंदसिरी बहुपरियणकयकलयलमागया तत्थ ॥३९२३।। दूराओ च्चिय सरहसनमंतसिरकुसुमदामनिवहेहिं । पणमिज्जइ चंदसिरी सेणा-विज्जाहरभडेहिं ।।३९२४।। सा वीरसेणदंसणपयट्टपुलयं वरिल्लवत्थेण । पच्छायंती सविणयमुवविसइ कुमारपिटुंमि ।।३९२५।। तो बंधुयत्तपयडियनामा खयरिंदसेहरासोया । पणमंति निव्वियारा चंदसिरीपायपंकरुहं ॥३९२६।।
Jain Education International
For Private & Personal Use Only
www.jainelibrary.org
