________________
३४१
सिरिभुयणसुंदरीकहा ॥
'नियबंधुलहुसहोयरवहवैरिरिणं अवस्स अवणेमि । हंतूण वीरसेणं करंमि गेण्हामि जयवत्तं' ॥३७२९।। इय पवणकेउराया काऊण विणिच्छियं मणे एयं । तुरियं पधावमाणो धरिउ(ओ) नियसेन्नसुहडेहिं ॥३७३०।। सेहरनरेसरो वि य चंदसिरीलाहजायपच्चासो । चिंतइ ‘हणेमि एयं पच्छा परिणेमि चंदसिरि' ।।३७३१।। इय जाव ते परोप्परनियबुद्धिवियप्पिएहिं चिट्ठति । ता कुमरेणं भणिओ रक्खसराया इमं वयणं ॥३७३२।। 'किं बहुएहिं वि निसयर ! खेयरपुरिसेहिं मारिएहिं पि? । मह पवण-सेहराणं अत्थि विवाओ न खयराणं ||३७३३।। ता कहसु महं तुरियं को पवणो? सेहरो व्व को एत्थ? | एण्हि च्चिय निज्जोडं करेमि किं बहुवियप्पेहिं?' ॥३७३४।। तो भणइ रक्खसिंदो ‘वच्छत्थलघोलमाणहारलओ । जो धरियधवलछत्तो उभयंसचलंतसियचमरो ॥३७३५।। पारद्धखेयरवहूरणरंगपवेसमंगलायारो । बहुबंदिविंदकलयलसंमदुग्घुट्ठजयसद्दो ॥३७३६॥ सो देव ! पवणकेऊ एसो उण दाहिणाण सेहरओ । हरियंदणंगराओ मणिमउडविहूसियसिरग्गो ॥३७३७।। घोलंतकन्नकुंडल-गंडत्थलसंघडंतपडिबिंबो । बिउणीकयभुयदंडो ओटुंघो वारनारीए ॥३७३८।। सिद्धत्थय-दोव्वंकुर-गोरोयणभूसिओत्तिमंगो य । गंधव्वगेयरसवसदरमउलियलोयणद्धंतो' ।।३७३९।।
Jain Education International
For Private & Personal Use Only
www.jainelibrary.org
