________________
३२६
सिरिभुयणसुंदरीकहा ॥ गंतूण तेहिं(हि) खणियं गब्भहरं तत्थ पविओ अत्थो । काउमलक्खपएसं विणिग्गया गब्भवणाओ ।।३५६७।। तो जणएणं भणिओ पुत्तो 'जोएसु देउलं सयलं । मा को वि इत्थ होही कप्पडिओ इत्थ पहिओ वा' ॥३५६८।। तो पुत्तेण य सयलं गवेसमाणेण देउलं दिट्ठो । एगो कोणे पडिओ कप्पडिओ मडयनिच्चेट्टो ।।३५६९।। हक्कारिऊण पियरं तं दंसइ तो पिया पुणो भणइ । ‘उट्टवसु' कत्तिएणं उट्ठविओ जाव निच्चेट्ठो ॥३५७०।। जोयइ सासूसासे न लक्खए ते वि कत्तिओ तस्स । 'मडयमिणं वच्चामो निज्जीवं ताय !' इय भणइ ॥३५७१।। सो भणिओ जणएणं 'पुत्तय ! जइ मडयमेव ता किं न । ओसूणं गंधो वा होइ न एयस्स अइदुस्स(स)हो ॥३५७२।। ता कुणसु मज्झ बुद्धिं छिन्नसु एयस्स नासियं ताव' । पुत्तेण निव्वियप्पं निच्छिन्ना नासिया तस्स ।।३५७३।। तह विन जंपइ न चलइ पुणो वि पिउणा सुओ इमं भणिओ । 'एण्हि छिन्नसु कन्ने' सुएण ते दो वि तह च्छिन्ना(छिन्ना) ।।३५७४।। तो जायपच्चएहिं मडयमिणं निच्छियं कहं इहरा । नासा-कन्नच्छेए थोवं पि तणुं न चालेइ ? ॥३५७५।। इय दो वि निव्वियप्पा पिय-पुत्ता सगिहमागया सुत्ता । सो देवउलपसुत्तो कप्पडिओ उट्ठिओ सहसा ।।३५७६॥ अह उट्ठिऊण खणियं गब्भहरं कड्डियं च तं दव्वं । थोवं कयं सहत्थे सेसं अण्णत्थ निक्खणियं ॥३५७७।।
Jain Education International
For Private & Personal Use Only
www.jainelibrary.org
