________________
३००
सिरिभुयणसुंदरीकहा ॥ इय एवं बहुवेए पयट्टमाणे वि जाणवत्तंमि । न चलइ ठाणाओ पयं इय अणभिन्नाणपडिवत्ती ॥३३८०।। लोएहिं वेयपसरंतपोयवसजायसंभवे(मे)हिं नहे । दीसइ तारानिवहो पच्छाहुत्तं (व) धावंतो ॥३३८१॥ इय तं पोयं पडुपवणपेल्लिरुद्दामवेयपसरंतं । पत्तं पंचदिणेहिं समुद्दमझंमि गिरिमेगं ॥३३८२।। जलहिमहणावसाणे सुरेहिं जो महणसमकिलंतेहिं । असमत्थेहिं व वोढुं मंदरसेलो व्व परिचत्तो ॥३३८३।। उव्विग्गो इव बाढं खारोयहिगब्भवासवसहीओ । उवसंतकुलिसतासो मेणायगिरि व्व नीहरिओ ॥३३८४।। जो महणबंध-मुणिचुलयपाण-सिरिहरणमाइदुक्खाण | सहणसमत्थो गरुओ हिययपएसो व्व जलहिस्स ॥३३८५।। दठूण गिरिवरं तं पज्जुनो भणइ कुमरमुद्दिसिउं । 'पेच्छसि देव ! गिरिंदं पुरओ गयणग्गपडिलग्गं ? ॥३३८६।। एयाओ गिरिवराओ उत्तरतीरं दुजोयणसएहिं । जइ एसो च्चिय पवणो ता जाणसु देव ! संपत्ता ॥३३८७॥ एयस्स देव! नामं विसालसिंगो त्ति गिरिवरिंदस्स । बहुपुफ(प्फ)फलभरोणयविविहुज्जाणेहिं जुत्तस्स ॥३३८८।। पक्खीणिंधण-जल-जवससंगहं देव ! बहुयदियहेहिं । इहइं च पडिखलिज्जइ पोयं उत्तरह तुब्भे वि ॥३३८९।। वीसमह सह पियाए इहयिं नरनाह ! तयणु संपुन्नं । काऊण पवहणमिओ उत्तरतीरंमि वच्चामि' ॥३३९०॥
Jain Education International
For Private & Personal Use Only
www.jainelibrary.org
